അടിമാലി: ചിത്തിരപുരം മീന്‍കെട്ട് ഭാഗത്ത് ജനവാസ മേഖലയില്‍ രാത്രിയുടെ മറവില്‍ ശുചിമുറി മാലിന്യം ഒഴുക്കിയതായി പരാതി.കഴിഞ്ഞ ദിവസം രാത്രിയിലായിരുന്നു പള്ളിവാസല്‍ പഞ്ചായത്തിലെ ഒമ്പതാം വാര്‍ഡുള്‍പ്പെടുന്ന ഭാഗത്ത് ശുചിമുറി മാലിന്യം നിക്ഷേപിക്കപ്പെട്ടത്. പാതയോരത്ത് മാലിന്യം നിക്ഷേപിച്ചതിനെ തുടര്‍ന്ന് റോഡിലേക്കും മാലിന്യം വ്യാപിക്കുന്ന സ്ഥിതിയുണ്ടായി. കെ എസ് ഇ ബി കോട്ടേഴ്‌സുകളും മറ്റ് വീടുകളുമൊക്കെയുള്ള പ്രദേശത്തിന് സമീപമാണ് മാലിന്യ നിക്ഷേപം നടന്നത്. കുടിവെള്ള ശ്രോതസ്സുകളും ഈ ഭാഗത്തുണ്ട്. മഴ പെയ്താല്‍ മാലിന്യം ഈ പ്രദേശത്തൊക്കെയും വ്യാപിക്കും.
സംഭവത്തിന് പിന്നില്‍ പ്രവര്‍ത്തിച്ചവരെ കണ്ടെത്തി നടപടി സ്വീകരിക്കണമെന്നാണ് ആവശ്യം. സംഭവത്തില്‍ പഞ്ചായത്തില്‍ പരാതി ലഭിച്ചതായും ആരോഗ്യ വകുപ്പിനോട് തുടര്‍ നടപടി സ്വീകരിക്കാന്‍ നിര്‍ദ്ദേശം നല്‍കിയതായും ഗ്രാമ പഞ്ചായത്തധികൃതര്‍ പറഞ്ഞു.
