‘കുട്ടികളെ യുദ്ധ തടവുകാരാക്കുന്ന ഏക രാജ്യം’; ഇസ്രയേലിനെതിരായ ജിജി ഹദീദിന്റെ പോസ്റ്റ് വിവാദം
ഇസ്രയേലിനെതിരായ ഇന്‍സ്റ്റഗ്രാം പോസ്റ്റിന് പിന്നാലെ അമേരിക്കന്‍ സൂപ്പര്‍ മോഡല്‍ ജിജി ഹദീദിന് സോഷ്യല്‍ മീഡിയയില്‍ കടുത്ത വിമര്‍ശനം. പിന്നാലെ പോസ്റ്റ് ഡിലീറ്റ് ചെയ്ത് താരം.
ഒക്ടോബര്‍ 7ന് ഹമാസിന്റെ ഭാഗത്ത് നിന്ന് ആക്രമണമുണ്ടാകുന്നതിനും വര്‍ഷങ്ങള്‍ക്ക് മുന്‍പ് ഇസ്രയേല്‍ പലസ്തീനികളെ വധിച്ചും, പീഡിപ്പിച്ചും, കടത്തിക്കൊണ്ടുപോയും ദ്രോഹിച്ചിട്ടുണ്ടെന്ന് ജിജി ഹദീദ് ഇന്‍സ്റ്റഗ്രാമില്‍ കുറിച്ചിരുന്നു. കുട്ടികളെ യുദ്ധ തടവുകാരാക്കുന്ന ലോകത്തെ ഏക രാജ്യമാണ് ഇസ്രയേലെന്നും ജിജി ഹദീദ് തുറന്നടിച്ചിരുന്നു. മരണപ്പെട്ട പലസ്തീനികളുടെ അവയവങ്ങള്‍ അവരുടെ അനുവാദമില്ലാതെ ഇസ്രയേല്‍ എടുക്കാറുണ്ടെന്നും ജിജി ഹദീദ് പങ്കുവെച്ച പോസ്റ്റില്‍ പറയുന്നു.
പോസ്റ്റ് വൈറലായതിന് പിന്നാലെ നിരവധി പേരാണ് ജിജി ഹദീദിനെ വിമര്‍ശിച്ച് രംഗത്ത് വന്നിരിക്കുന്നത്. ജിജി ഹദീദിനെതിരെ ഇസ്രയേലി സര്‍ക്കാരും രംഗത്ത് വന്നിട്ടുണ്ട്. ഇസ്രയേലില്‍ ഹമാസ് നടത്തിയ കൂട്ടക്കുരുതിയില്‍ ധീരമായി ഒന്നും തന്നെയില്ലെന്നും തീവ്രവാദികള്‍ക്കെതിരായുള്ള ഇസ്രയേലിന്റെ ചെറുത്ത് നില്‍പ്പിനെ പിന്തുണയ്ക്കുകയാണ് ചെയ്യേണ്ടതെന്നും ഇസ്രയേല്‍ മറുപടിയായി പറഞ്ഞു.
