ഗൂഗിള്‍ പേ യുപിഐ വഴി ഫോണ്‍ റീചാര്‍ജ് ചെയ്താല്‍ ഇനി അധിക പണം നല്‍കണമെന്ന് റിപ്പോര്‍ട്ട്. ഗൂഗിള്‍ പേയിലൂടെ പ്രീപെയ്ഡ് പ്ലാന്‍ വാങ്ങുന്ന ഉപയോക്താക്കളാണ് അധിക രൂപ നല്‍കേണ്ടി വരിക. പേയ്ടിഎം, ഫോണ്‍ പേ എന്നീ യുപിഐ ആപ്പുകള്‍ നേരത്തെ തന്നെ ഫോണ്‍ റീചാര്‍ജിന് സര്‍വീസ് ചാര്‍ജ് ഈടാക്കിയിരുന്നു. ഇക്കൂട്ടത്തിലേത്താണ് ഗൂഗിള്‍ പേയും വന്നിരിക്കുന്നത്.
ഗൂഗിള്‍ പേ സര്‍വീസ് ചാര്‍ജിന്റെ കാര്യം ഔദ്യോഗികമായി ഉപയോക്താക്കളെ അറിയിച്ചിട്ടില്ല. ഗൂഗിള്‍ പേ യുപിഐ വഴി ഫോണ്‍ റീചാര്‍ജ് ചെയ്ത ഉപയോക്താക്കള്‍ക്ക് മൂന്ന് രൂപ അധികമായി നല്‍കേണ്ടി വന്നു. ഇത് ശ്രദ്ധയില്‍പ്പെട്ടതോടെയാണ് ജിപേയും റീചാര്‍ജിനായി സര്‍വീസ് ചാര്‍ജ് ഏര്‍പ്പെടുത്തിയത് അറിയുന്നത്.
നൂറ് രൂപയ്ക്ക് താഴെ വരുന്ന ഫോണ്‍ റീചാര്‍ജുകള്‍ക്ക് കണ്‍വേയന്‍സ് ഫീ വരില്ല. എന്നാല്‍ നൂറ് രൂപയ്ക്കും 200 രൂപയ്ക്കും മധ്യേ വരുന്ന റീചാര്‍ജുകള്‍ക്ക് രണ്ട് രൂപയും 200 300 രൂപയ്ക്ക് മധ്യേ വരുന്ന റീചാര്‍ജുകള്‍ക്ക് മൂന്ന് രൂപയുമാണ് അധിക ചാര്‍ജ് വരിക. 300 രൂപയ്ക്ക് മുകളിലുള്ള റീചാര്‍ജുകള്‍ക്കും മൂന്ന് രൂപ തന്നെയാണ് കണ്‍വേയന്‍സ് ഫീ ആയി ഈടാക്കുക.
ഇനി മുതല്‍ അതത് ടെലിക്കോം ഓപറേറ്ററുടെ വെബ്‌സൈറ്റ് വഴിയോ മൊബൈല്‍ ആപ്പ് വഴിയോ റീചാര്‍ജ് ചെയ്താല്‍ മാത്രമേ കണ്‍വേയന്‍സ് ഫീ കൂടാതെ റീചാര്‍ജ് സാധ്യമാകൂ എന്ന് ചുരുക്കം.
