അടിമാലി: ഇന്നലെ രാത്രിയില്‍ അടിമാലിയില്‍ ഉണ്ടായ വാഹനാപകടത്തില്‍ ഒരാള്‍ മരിച്ചു. അടിമാലി ടൗണിലെ പ്രിന്‍സ് സ്റ്റുഡിയോ ഉടമ ചിറ്റടിച്ചാലില്‍ പ്രിന്‍സാണ് ബൈക്ക് അപകടത്തില്‍ മരിച്ചത്.രാത്രിയില്‍ വീട്ടിലേക്ക് മടങ്ങവെ ബൈക്ക് കലുങ്കില്‍ നിന്നും തോട്ടിലേക്ക് മറിഞ്ഞാണ് അപകടം സംഭവിച്ചത്. ടൗണില്‍ ബി എസ് എന്‍ എല്‍ ജംഗ്ഷന് സമീപത്തു നിന്നാരംഭിച്ച് കാംകോ റോഡിലേക്കെത്തുന്ന ബൈപ്പാസ് റോഡിലൂടെയായിരുന്നു പ്രിന്‍സ് സഞ്ചരിച്ചത്. ഈ റോഡിലുള്ള കലുങ്കില്‍ നിന്ന് ബൈക്ക് തോട്ടിലേക്ക് മറിയുകയായിരുന്നു. തലക്ക് ഗുരുതരമായി പരിക്കേറ്റ പ്രിന്‍സിനെ താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
ശബ്ദം കേട്ട് സമീപവാസികള്‍ പുറത്തിറങ്ങി നോക്കിയപ്പോഴാണ് അപകട വിവരം അറിയുന്നത്. തോട്ടിലേക്ക് പതിച്ച ബൈക്കിന്റെ പ്രകാശം കണ്ടാണ് സമീപവാസികള്‍ എത്തിയത്. പ്രിന്‍സ് ബൈക്കില്‍ നിന്നും തെറിച്ച് തോട്ടിലേക്ക് വീണിരുന്നു. ഉടന്‍ സമീപവാസികള്‍ തോട്ടിലിറങ്ങി പ്രിന്‍സിനെ കരക്കെത്തിക്കുകയും ആശുപത്രിയിലേക്ക് മാറ്റുകയും ചെയ്തു.ഏറെ നാളായി അടിമാലി ടൗണില്‍ സ്റ്റുഡിയോ നടത്തി വരുന്ന പ്രിന്‍സ് അടിമാലിക്കാര്‍ക്കൊക്കെയും സുപരിചിതനാണ്.
