അടിമാലി: അടിമാലി പത്താംമൈല്‍ ടൗണിലെ വ്യാപാര സ്ഥാപനത്തില്‍ മോഷണം. ഇന്നലെ രാത്രിയിലാണ് മോഷണം നടന്നത്. ടൗണില്‍ പ്രവര്‍ത്തിക്കുന്ന സിറ്റി സ്റ്റോഴ്‌സെന്ന സ്‌റ്റേഷനറി കടയിലാണ് മോഷണം നടന്നത്. രാവിലെ കടയുടമ സ്ഥാപനം തുറക്കാനെത്തിയപ്പോഴാണ് മോഷണ വിവരം അറിയുന്നത്. കടയുടെ താഴ് തുറന്നാണ് മോഷണം നടത്തിയത്. പണമടക്കം ഇരുപത്തയ്യായിരം രൂപയോളം നഷ്ടം സംഭവിച്ചതായി കടയുടമ പറഞ്ഞു.
സംഭവത്തില്‍ കടയുടമ നല്‍കിയ പരാതിയുടെ അടിസ്ഥാനത്തില്‍ അടിമാലി പോലീസ് അന്വേഷണം ആരംഭിച്ചു. പോലീസ് സ്ഥലത്തെത്തി തെളിവുകള്‍ ശേഖരിച്ചു.ഇന്നലെ രാത്രിയില്‍ ഈ ഭാഗത്ത് ഏറെ സമയം വൈദ്യുതി മുടങ്ങിയതായി പറയപ്പെടുന്നു. ഈ സമയത്താകാം മോഷണം നടന്നതെന്നാണ് വിലയിരുത്തല്‍.ദേശിയപാത കടന്ന് പോകുന്ന ടൗണാണ് പത്താംമൈല്‍.കഴിഞ്ഞ ദിവസം ടൗണില്‍ നിരീക്ഷണ ക്യാമറകളും സ്ഥാപിച്ചിരുന്നു.അടിമാലി ഭാഗത്ത് മോഷണങ്ങള്‍ ആവര്‍ത്തിക്കപ്പെടുന്നതില്‍ ആശങ്ക വര്‍ധിച്ചിട്ടുണ്ട്.
