അടിമാലി: മധ്യവേനല്‍ അവധിയാരംഭിച്ചതോടെ ഹൈറേഞ്ചിലെ ബോട്ടിംഗ് സെന്ററുകള്‍ സജീവമാകുന്നു. ബോട്ടിംഗ് ആസ്വദിക്കാന്‍ നിരവധി സഞ്ചാരികളാണ് ചെങ്കുളമടക്കമുള്ള സെന്ററുകളില്‍ എത്തുന്നത്. ജില്ലയിലേക്ക് ഏറ്റവും അധികം വിനോദ സഞ്ചാരികള്‍ എത്തുന്ന മാസങ്ങളാണ് ഏപ്രില്‍, മെയ് മാസങ്ങള്‍. വിദ്യാലയങ്ങള്‍ അടച്ച് മധ്യവേനല്‍ അവധിയാരംഭിച്ചതോടെ ഹൈറേഞ്ചിലേക്കുള്ള വിനോദ സഞ്ചാരികളുടെ വരവും വര്‍ധിച്ചു. ഇതോടെ ബോട്ടിംഗ് സെന്ററുകളില്‍ സഞ്ചാരികളുടെ തിരക്ക് വര്‍ധിച്ചു.
സ്പീഡ് ബോട്ടുകളിലും ഹൗസ് ബോട്ടുകളിലുമെല്ലാം സഞ്ചാരികള്‍ ജലാശയ പരപ്പില്‍ സവാരി നടത്തി കാഴ്ച്ചകള്‍ ആസ്വദിക്കാന്‍ ഇഷ്ടപ്പെടുന്നു. ക്രിസ്തുമസ്, പുതുവത്സരാഘോഷങ്ങള്‍ക്ക് ശേഷം ഹൈറേഞ്ചിലേക്കെത്തുന്ന വിനോദ സഞ്ചാരികളുടെ എണ്ണത്തില്‍ വലിയ കുറവ് വന്നിരുന്നു. പോയ ക്രിസ്തുമസ്, പുതുവത്സരാഘോഷ നാളുകളിലും പ്രതീക്ഷിച്ച രീതിയിലുള്ള സഞ്ചാരികള്‍ ഹൈറേഞ്ചിലേക്കെത്തിയില്ല. ഇത് ഈ മേഖലയില്‍ നിന്നും വരുമാനം കണ്ടെത്തിയിരുന്നവര്‍ക്ക് തിരിച്ചടിയായിരുന്നു.
മൂന്നാറിലേക്കെത്തുന്ന വലിയൊരു വിഭാഗം സഞ്ചാരികളും ബോട്ടിംഗ് സെന്ററുകളില്‍ എത്തിയ ശേഷമെ മടങ്ങാറൊള്ളു. വരും ദിവസങ്ങളില്‍ ബോട്ടിംഗ് സെന്ററുകളില്‍ ഇനിയും സഞ്ചാരികളുടെ തിരക്ക് വര്‍ധിക്കുമെന്നും ഇതിലൂടെ മെച്ചപ്പെട്ട വരുമാനം കണ്ടെത്താനാകുമെന്നുമാണ് പ്രതീക്ഷ.
