മൂന്നാറില്‍ സാഹസികതയും വിനോദവും പകരുന്ന പുതിയ ഡോം തീയേറ്റര്‍ പദ്ധതിയുമായി ഡിറ്റിപിസി
മൂന്നാര്‍: മൂന്നാറിലെത്തുന്ന വിനോദ സഞ്ചാരികള്‍ക്ക് സാഹസികതയും വിനോദവും പകരുന്ന പുതിയ ഡോം തീയേറ്റര്‍ പദ്ധതിയുമായി ഡിറ്റിപിസി. മൂന്നാര്‍ ഗവ. ബോട്ടാണിക്കല്‍ ഗാര്‍ഡനിലാണ് 360 ഡിഗ്രി സൂപ്പര്‍ റിയാലിറ്റി ഡോം തീയേറ്റര്‍ നിര്‍മിച്ചിരിക്കുന്നത്. കൂടുതല്‍ സഞ്ചാരികളെ ഗാര്‍ഡനിലേക്കാകര്‍ഷിക്കുകയെന്ന ലക്ഷ്യത്തോടെയാണ് പുതിയ പദ്ധതിക്ക് രൂപം നല്‍കിയിട്ടുള്ളത്. ജില്ലയില്‍ രണ്ടാമത്തെ ഡോം തിയറ്റര്‍ ആണ് മൂന്നാറിലെ ബൊട്ടാണിക്കല്‍ ഗാര്‍ഡനില്‍ സജ്ജീകരിച്ചിരിക്കുന്നത്.
തീയേറ്ററിനുള്ളില്‍ പൂര്‍ണ്ണമായി നിറഞ്ഞു നില്‍ക്കുന്ന സ്‌ക്രീനില്‍ ത്രി ഡി ഗ്ലാസുകള്‍ ഇല്ലാതെ തന്നെ ത്രില്ലിങ് ദൃശ്യങ്ങള്‍ കാണാനാകും. പേടിപ്പെടുത്തുന്നതും രസകരവുമായ ചെറുസിനിമകള്‍ കണ്ട് ആസ്വദിക്കാന്‍ കഴിയുന്ന വിധം ഡോം തിയേറ്ററില്‍ ഒരെ സമയം 30 പേരെ വരെ ഉള്‍ക്കൊള്ളാന്‍ കഴിയുന്ന സംവിധാനമാണ് ഒരുക്കിയിരിക്കുന്നത്. കുട്ടികള്‍ക്കും മുതിര്‍ന്നവര്‍ക്കും ഒരുപോലെ ആസ്വദിക്കാന്‍ കഴിയുന്ന തരത്തിലാണ് തിയേറ്റര്‍ സജ്ജീകരിച്ചിരിക്കുന്നത്.
സ്വകാര്യ സംരംഭകരും ഡിറ്റിപിസിയും സഹകരിച്ച് 80 ലക്ഷത്തോളം രൂപ ചെലവിട്ടാണ് തീയേറ്റര്‍ നിര്‍മ്മിച്ചത്. അടുത്ത ദിവസം തീയേറ്റര്‍ സഞ്ചാരികള്‍ക്കായി തുറന്നു നല്‍കും. ബോട്ടാണിക്കല്‍ ഗാര്‍ഡനില്‍ ഒരുക്കുന്ന ഗ്ലാസ് വാച്ച് ടവറിന്റെ നിര്‍മ്മാണം അവസാന ഘട്ടത്തിലാണ്.
