മാങ്കുളം: പഴമ്പള്ളിച്ചാല്‍ മേഖലയിലൂടെ കടന്ന് പോകുന്ന പഴമ്പള്ളിച്ചാല്‍ പരിശക്കല്ല് റോഡില്‍ സംരക്ഷണഭിത്തിയുടെ നിര്‍മ്മാണം നടത്തിയ ഭാഗത്ത് മണ്ണിട്ട് നികത്താത്തത് പ്രദേശവാസികള്‍ക്ക് ദുരിതമാകുന്നു. നൂറ്റമ്പതോളം കുടുംബങ്ങള്‍ ആശ്രയിക്കുന്ന റോഡിലാണ് ഇപ്പോഴും വാഹന ഗതാഗതം സാധ്യമല്ലാത്ത സ്ഥിതിയുള്ളത്. ജീപ്പും ഓട്ടോറിക്ഷകളുമൊക്കെ കടന്ന് പോകുന്ന വഴിയായിരുന്നു ഇത്. എന്നാല്‍ റോഡിന്റെ ഒരു ഭാഗം ഇടിഞ്ഞതോടെ ഗതാഗതം നിലച്ചു. പിന്നീട് ഫണ്ടനുവദിക്കുകയും ഇടിഞ്ഞ് പോയ ഭാഗത്ത് സംരക്ഷണ ഭിത്തിയുടെ നിര്‍മ്മാണം നടത്തുകയും ചെയ്തു. പക്ഷെ മണ്ണിട്ട് നികത്തി സംരക്ഷണ ഭിത്തി റോഡുമായി ബന്ധിപ്പിച്ചില്ല. ഇക്കാരണം കൊണ്ടു തന്നെ റോഡിപ്പോഴും യാത്രായോഗ്യമായി തീര്‍ന്നിട്ടില്ലെന്ന് പ്രദേശവാസികള്‍ പറയുന്നു. രോഗികളായ ആളുകള്‍ ഉള്‍പ്പെടെ ഈ ഭാഗത്തെ വീടുകളില്‍ കഴിയുന്നുണ്ട്. റോഡില്ലാത്തത് ഇവര്‍ക്കൊക്കെയും വലിയ ബുദ്ധിമുട്ടാകുന്നു. ഫണ്ട് വകയിരുത്തുകയും നിര്‍മ്മാണം നടത്തുകയുമൊക്കെ ചെയ്തെങ്കിലും പൊതുഖജനാവിലെ പണം ചിലവഴിച്ച് നടത്തിയ നിര്‍മ്മാണം കൊണ്ട് നാട്ടുകാര്‍ക്ക്് വേണ്ട പ്രയോജനം ലഭിച്ചിട്ടില്ല. സംരക്ഷണ ഭിത്തിയും റോഡും വെവ്വേറെ നിലനില്‍ക്കുന്ന സ്ഥിതിയാണുള്ളത്. ഈ ഭാഗത്ത് മണ്ണിട്ട് നികത്തി റോഡ് യാത്രായോഗ്യമാക്കണമെന്നാണ് ആവശ്യം.
