മധ്യവേനലവധി അവസാനിക്കുമ്പോള്‍ മൂന്നാറില്‍ ഇത്തവണ അനുഭവപ്പെട്ടത് സഞ്ചാരികളുടെ വലിയ തിരക്ക്
മൂന്നാര്‍: മധ്യവേനലവധി അവസാനിക്കുമ്പോള്‍ മൂന്നാറില്‍ ഇത്തവണയും അനുഭവപ്പെട്ടത് സഞ്ചാരികളുടെ വലിയ തിരക്കാണ്. ചുട്ടുപൊള്ളുന്ന വേനലില്‍ കോടമഞ്ഞ് കാണാനും കുളിരാസ്വദിക്കാനും ഈ മധ്യവേനല്‍ അവധിക്കാലത്തും മൂന്നാറിലേക്ക് സഞ്ചാരികള്‍ ഒഴുകിയെത്തി. ബോട്ടിംഗ് സെന്ററുകളിലും ഉദ്യാനങ്ങളിലും സഞ്ചാരിളുടെ വലിയ തിരക്കനുഭവപ്പെട്ടു.
ഇരവികുളം ദേശിയോദ്യാനം, ലക്കം വെള്ളച്ചാട്ടം എന്നിവിടങ്ങളായിരുന്നു സഞ്ചാരികളുടെ തിരക്ക് കൂടുതലായി അനുഭവപ്പെട്ട രണ്ട് പ്രധാന കേന്ദ്രങ്ങള്‍. മെയ് മാസത്തില്‍ മാത്രം ഇരവികുളം ദേശിയോദ്യാനത്തിലും ലക്കം വെള്ളച്ചാട്ടത്തിലുമായി ഒന്നര ലക്ഷത്തോളം സഞ്ചാരികളെത്തിയതായാണ് കണക്ക്. ഇതിലൂടെ മൂന്നരക്കോടിയോളം രൂപ വരുമാനമായി ലഭിച്ചു. ഇത്തവണയും ഇരവികുളം ദേശിയോദ്യാനത്തില്‍ സഞ്ചാരികള്‍ക്കായി കൂടുതല്‍ പുതുമയും സൗകര്യങ്ങളും ക്രമീകരിച്ചിരുന്നു.മലനിരകളും ചോലവനങ്ങളും പുല്‍മേടുകളും നിറഞ്ഞ പാര്‍ക്കിനെ പൂര്‍ണ്ണതോതില്‍ വെര്‍ച്ച്വല്‍ റിയാലിറ്റിയില്‍ കണ്ടാസ്വദിക്കുവാന്‍ സംവിധാനം ഒരുക്കി.
മുമ്പ് വിനോദസഞ്ചാരികള്‍ക്ക് പാര്‍ക്കിലെത്തി മണിക്കൂറുകളോളം ക്യൂവില്‍ നിന്ന് ടിക്കറ്റ് എടുത്ത് പാര്‍ക്കില്‍ കയറേണ്ട സ്ഥിതിയാണ് ഉണ്ടായിരുന്നത്. അത്തരം രീതികള്‍ പാടെ മാറി സന്ദര്‍ശകര്‍ക്ക് ഓണ്‍ ലൈനായി ടിക്കറ്റുകള്‍ എടുക്കുന്നതിന് ഇന്ന് സൗകര്യമുണ്ട്. ട്രാഫിക്ക് കുരുക്ക് കുറക്കുന്നതിന് പ്രത്യക പാര്‍ക്കിംങ്ങ് സംവിധാനവും ഈ അവധിക്കാലത്ത് തയ്യാറാക്കിയിരുന്നു. മധ്യവേനല്‍ അവധി അവസാനിച്ചാലും ഉദ്യാനത്തിലേക്കുള്ള സഞ്ചാരികളുടെ വരവ് തുടരുമെന്നാണ് പ്രതീക്ഷ.
