തുടര്‍ച്ചയായ മഴ; കൊക്കോ കായ്കള്‍ക്ക് ചീയ്ച്ചില്‍ കര്‍ഷകര്‍ക്ക് തിരിച്ചടി
മാങ്കുളം: മഴ കനക്കും മുമ്പെ കൊക്കോ കായ്കള്‍ക്ക് ചീയ്ച്ചില്‍ പിടിച്ചിട്ടുള്ളത് കര്‍ഷകര്‍ക്ക് തിരിച്ചടിയാകുന്നു. മെയ് മാസം ആദ്യം മുതല്‍ ആരംഭിച്ച മഴ തോരാതെ വന്നതാണ് കൊക്കോ കര്‍ഷകര്‍ക്ക് തിരിച്ചടിയായത്. സാധാരണ വേനല്‍ മഴക്ക് ശേഷം വെയില്‍ ലഭിക്കാറുണ്ടായിരുന്നു. എന്നാല്‍ ഇത്തവണ വെയില്‍ ലഭിച്ചില്ല. ഇക്കാരണം കൊണ്ടു തന്നെ പല കര്‍ഷകര്‍ക്കും മഴയെത്തും മുമ്പെ കൊക്കോ മരങ്ങളില്‍ മരുന്നടിക്കുന്നതിനും മറ്റു പരിപാലനത്തിനും സാവകാശം ലഭിച്ചില്ല. ഇത് കായ്കള്‍ വലിയ തോതില്‍ ചീയുന്നതിന് ഇടവരുത്തിയിട്ടുണ്ട്.
റെക്കോഡ് വിലയില്‍ ഇടിവ് സംഭവിച്ചിട്ടുണ്ടെങ്കിലും മുന്‍കാലങ്ങളെ അപേക്ഷിച്ച് ഇപ്പോഴും കൊക്കോയ്ക്ക് മെച്ചപ്പെട്ട വില ലഭിക്കുന്നുണ്ട്. ഉണങ്ങിയ പരിപ്പിന് 500 രൂപയും പച്ച പരിപ്പിന് 140 രൂപയുമാണ് വില. ഉണങ്ങിയ പരിപ്പിന് വില ഇത്തവണ ആയിരത്തിന് മുകളിലേക്ക് ഉയര്‍ന്നിരുന്നു.
വില ഉയര്‍ന്നപ്പോഴും വേണ്ട വിധത്തിലുള്ള ഉത്പാദനം ഇല്ലെന്ന നിരാശ കര്‍ഷകര്‍ക്കുണ്ടായിരുന്നു. ഇതിന് പിന്നാലെയാണിപ്പോള്‍ കൊക്കോ കായ്കള്‍ക്ക് ചീയ്ച്ചില്‍ ബാധിച്ചിട്ടുള്ളത്. മഴ കനക്കുന്നതോടെ കായ്കള്‍ കൂടുതലായി ചീഞ്ഞ് ഉത്പാദനം പൂര്‍ണ്ണമായി ഇല്ലാതാകുമോയെന്ന എന്ന ആശങ്കയും കര്‍ഷകര്‍ പങ്ക് വയ്ക്കുന്നു.
