അടിമാലി: അടിമാലി വിശ്വദീപ്തി പബ്ലിക് സ്‌കൂളും മോട്ടോര്‍ വാഹന വകുപ്പും സയുക്തമായി അടിമാലിയിലെ വ്യാപാരി സംഘടനകളുടെ സഹകരണത്തോടെ പാരീസ് ഒളിമ്പിക്സിന് മുന്നോടിയായി നടത്തുന്ന മിനിമാരത്തോണ്‍ ‘വിസ്പാരോണ്‍ 2024 നാളെ നടക്കും.കായിക മേഖലയോടുള്ള അഭിരുചി കുട്ടികളില്‍ വളര്‍ത്തുന്നതോടൊപ്പം അശ്രദ്ധ മൂലം ഒരു ജീവനും റോഡില്‍ പൊലിയരുതെന്ന സന്ദേശം ജനങ്ങളില്‍ എത്തിക്കുക എന്ന ലക്ഷ്യത്തോടെയാണ് മാരത്തോണ്‍ നടത്തുന്നത്.
10 കിലോമീറ്റര്‍ ദൈര്‍ഘ്യമുള്ള മിനി മാരത്തോണ്‍ രാവിലെ 7 ന് കല്ലാറുകുട്ടി പാലത്തില്‍ നിന്നാരംഭിക്കും. അടിമാലി സര്‍ക്കിള്‍ ഇന്‍സ്‌പെക്ടര്‍ ജോസ് മാത്യു മാരത്തോണ്‍ ഫ്‌ലാഗ് ഓഫ് ചെയ്യും.മിനി മാരത്തോണ്‍ അടിമാലിയില്‍ എത്തിയ ശേഷമാകും ഒന്നര കിലോമീറ്റര്‍ ദൈര്‍ഘൃമുള്ള ഫണ്‍മാരത്തോണ്‍ ആരംഭിക്കുക. അടിമാലി സോപാനം സാംസ്‌കാരിക കേന്ദ്ര ത്തിന് സമീപത്ത് നിന്നാരംഭിക്കുന്ന ഫണ്‍ മാരത്തോണ്‍ ആര്‍ ടി ഒ രാജീവ് കെ കെ ഫ്‌ലാഗ് ഓഫ് ചെയ്യും.
സംസ്ഥാനത്തിന്റെ വിവിധ ഭാഗങ്ങളില്‍ നിന്നായി 200ല്‍ അധികം കായികതാരങ്ങള്‍ മാരത്തോണില്‍ പങ്കെടുക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു.മാരത്തോണിലെ ഒന്നാംസ്ഥാനക്കാര്‍ക്ക് 15,000 രൂപയും രണ്ടാം സ്ഥാനകാര്‍ക്ക് 10,000 രൂപയും മൂന്നാം സ്ഥാനക്കാര്‍ക്ക് 5000 രൂപയും ലഭിക്കും. കൂടാതെ 10 വരെയുള്ള സ്ഥാനങ്ങള്‍ക്ക് ക്യാഷ് പ്രൈസും നല്‍കും. മത്സര ശേഷം നടക്കുന്ന പൊതുസമ്മേളത്തില്‍ വിശ്വദീപ്തി സ്‌കൂള്‍ പ്രിന്‍സിപ്പാല്‍ ഫാ. ഡോ. രാജേഷ് ജോര്‍ജ്ജ്, ഫാ. ഷിന്റോ കോലത്തുപടവില്‍, ഇടുക്കി ആര്‍ ടി ഒ രാജീവ് കെ കെ, അടിമാലി ഗ്രാമ പഞ്ചായത്ത് പ്രസിഡന്‍് സൗമ്യ അനില്‍, വൈസ് പ്രസിഡന്റ് അനസ് ഇബ്രഹിം തുടങ്ങിയവര്‍ സംസാരിക്കും.വാര്‍ത്താ സമ്മേളനത്തില്‍ വിശ്വദീപ്തി സ്‌കൂള്‍ സ്റ്റാഫ് സെക്രട്ടറി ഡെല്‍ഹി ഇ എഫ്, ദേവികുളം ജോയിന്റ് ആര്‍ ടി ഒ എല്‍ദോ റ്റി എച്ച്, മോട്ടോര്‍ വെഹിക്കിള്‍ ഇന്‍സ്‌പെക്ടര്‍ ദീപു എന്‍ കെ, ഫാ. ഷിന്റോ കോലത്തു പടവില്‍, ഫാ. ജിയോ ജോസ് കോക്കണ്ടത്തില്‍ തുടങ്ങിയവര്‍ പങ്കെടുത്തു.
