അടിമാലി: അടിമാലി ടൗണില്‍ പഞ്ചായത്ത് ടൗണ്‍ഹാളിന് സമീപം ഓടുന്ന ബസിന് മുന്‍ഭാഗത്തേക്ക് മരം കടപുഴകി വീണു.അപകടത്തില്‍ ബസ് യാത്രക്കാരിക്ക് പരിക്കേറ്റു.ഇന്നുച്ചയോടെയാണ് അപകടം സംഭവിച്ചത്.അടിമാലി ഭാഗത്തേക്ക് വരികയായിരുന്ന സ്വകാര്യബസിന് മുന്‍ഭാഗത്തേക്കാണ് മരം കടപുഴകി വീണത്.മരം വീണതോടെ ബസിന്റെ മുന്‍ഭാഗത്തെ ചില്ല് തകര്‍ന്നു.
രാജാക്കാട് സ്വദേശിനിയായ ബസ് യാത്രക്കാരിക്ക് ചെറിയ പരിക്ക് സംഭവിച്ചു.ഇവരെ പ്രാഥമിക ചികിത്സക്കായി മാറ്റി.അടിമാലി അഗ്നിരക്ഷാ സേനയെത്തി റോഡിലേക്ക് വീണ മരം മുറിച്ചു നീക്കി.
പാതയോരത്ത് ചുവട് ദ്രവിച്ച് ബലക്ഷയം വന്ന് നിന്നിരുന്ന മരമാണ് ഒാടുന്ന ബസിന് മുകളിലേക്ക് വീണത്.പൂര്‍ണ്ണമായി ബസിന്റെ മുകള്‍ ഭാഗത്തേക്ക് മരം പതിച്ചിരുന്നുവെങ്കില്‍ വലിയ അപകടം സംഭവിക്കുമായിരുന്നു.
ദിവസങ്ങള്‍ക്ക് മുമ്പ് ഇതേ മരത്തിന്റെ കൂറ്റന്‍ ശിഖരം ഒടിഞ്ഞ് ഓടികൊണ്ടിരുന്ന ഓട്ടോറിക്ഷയുടെ മുകളിലേക്ക് വീണിരുന്നു.പരിക്കുകളോടെ ഓട്ടോറിക്ഷായാത്രികന്‍ രക്ഷപ്പെട്ടു.അന്ന് മുതല്‍ ഈ മരം മുറിച്ച് നീക്കണമെന്ന ആവശ്യം വാഹനയാത്രികരും സമീപവാസികളും മുമ്പോട്ട് വച്ചിരുന്നു.മരം മുറിക്കാതെ വന്നതോടെയാണ് ഇന്ന് വീണ്ടും മറ്റൊരപകടം സംഭവിച്ചത്.
