മൂന്നാര്‍: മൂന്നാറില്‍ ജനവാസ മേഖലയില്‍ കാട്ടാനയും കാട്ടുപോത്തും.നല്ലതണ്ണി എസ്റ്റേറ്റില്‍ ലയങ്ങള്‍ക്ക് സമീപം കാട്ടുപോത്ത് ഇറങ്ങി.കാട്ടുപോത്തിന്റെ സാന്നിധ്യം പ്രദേശത്ത് പതിവാകുന്നുവെന്നും കൃഷിയിടത്തില്‍ ഇറങ്ങുന്ന കാട്ടുപോത്ത് നാശം വരുത്തുന്നുവെന്നും പ്രദേശവാസികള്‍ പറയുന്നു.കാട്ടുപോത്ത് ജനവാസ മേഖലയില്‍ ഇറങ്ങുന്നതില്‍ വലിയ ആശങ്ക ഉയര്‍ന്നിട്ടുണ്ട്.
മൂന്നാര്‍ ചിറ്റുവാരൈ സൗത്ത് ഡിവിഷനില്‍ കാട്ടുകൊമ്പന്‍ പടയപ്പ ഇറങ്ങി കൃഷിനാശം വരുത്തി.ജനവാസ മേഖലയിലൂടെ ചുറ്റിത്തിരിയുന്ന പടയപ്പയെ വനത്തിലേക്ക് തുരത്താത്തതില്‍ പ്രതിഷേധവും ശക്തമാണ്. മഴക്കാലമാരംഭിച്ചിട്ടും കാട്ടുകൊമ്പന്‍ ജനവാസ മേഖലയില്‍ നിന്നും പിന്‍വാങ്ങുന്നില്ല. മുന്‍ വര്‍ഷങ്ങളില്‍ മഴ പെയ്ത് വനത്തില്‍ തീറ്റ വര്‍ദ്ധിക്കുന്നതോടെ കാട്ടാന ഉള്‍വനത്തിലേക്ക് പിന്‍വാങ്ങിയിരുന്നു.
പിന്നീട് വേനല്‍ കനക്കുന്നതോടെ തീറ്റതേടി വീണ്ടും ജനവാസമേഖലയില്‍ ഇറങ്ങുന്നതായിരുന്നു പതിവ്. എന്നാല്‍ ഇപ്പോള്‍ കഴിഞ്ഞ കുറെ മാസങ്ങളായി കാട്ടാന ജനവാസ മേഖലയില്‍ തന്നെ തുടരുകയാണ്. ഇടക്ക് മൂന്നാര്‍ മേഖലയില്‍ നിന്ന് പടയപ്പ മറയൂര്‍ മേഖലയിലേക്കും എത്താറുണ്ട്.
