അടിമാലി മണ്ണിടിച്ചില് ദുരന്തം; ഗ്രാമപഞ്ചായത്തിന്റെ നേതൃത്വത്തില് സര്വ്വകക്ഷി യോഗം ചേര്ന്നു, കുടുംബങ്ങളുടെ പുനരധിവാസത്തിനായി പ്രത്യേക പാക്കേജ്ജ് അനുവദിക്കണമെന്ന ആവശ്യം സര്ക്കാരിന് മുമ്പിലവതരിപ്പിക്കും
അടിമാലി: അടിമാലി മണ്ണിടിച്ചില് ദുരന്തത്തിന്റെ പശ്ചാത്തലത്തില് തുടര് നടപടികളില് തീരുമാനം കൈകൊള്ളുന്നതിനായി അടിമാലി ഗ്രാമപഞ്ചായത്തിന്റെ നേതൃത്വത്തില് സര്വ്വകക്ഷി യോഗം ചേര്ന്നു. മണ്ണിടിച്ചില് ദുരന്തം സംഭവിച്ച് രണ്ട് ദിവസങ്ങള് പിന്നിട്ട സാഹചര്യത്തിലായിരുന്നു അടിമാലി ഗ്രാമപഞ്ചായത്തിന്റെ നേതൃത്വത്തില് സര്വ്വകക്ഷിയോഗം വിളിച്ച് ചേര്ത്തത്. ദുരന്തത്തിന്റെ പശ്ചാത്തലത്തില് ഇതുവരെ നടന്ന ദുരന്തനിവാരണ, പുനരധിവാസ പ്രവര്ത്തനങ്ങള് സര്വ്വ കക്ഷിയോഗം വിശകലനം ചെയ്തു.
ദുരന്തമുഖത്ത് നിന്നും കുടുംബങ്ങളെ തിരികെ ജീവിതത്തിലേക്ക് കൈപിടിച്ച് കയറ്റാന് നടത്തേണ്ടുന്ന പ്രവര്ത്തനങ്ങള് യോഗം ചര്ച്ച ചെയ്തു. കുടുംബങ്ങളുടെ പുനരധിവാസത്തിനായി പ്രത്യേക പാക്കേജ്ജ് അനുവദിക്കണമെന്ന ആവശ്യം സര്ക്കാരിന് മുമ്പിലവതരിപ്പിക്കാനും മരണപ്പെട്ട ബിജുവിന്റെ ഭാര്യയുടെ തുടര്ചികിത്സക്ക് വേണ്ടുന്ന ഇടപെടലുകള് കാര്യക്ഷമമായി മുമ്പോട്ട് കൊണ്ടുപോകാനും സര്വ്വകക്ഷിയോഗം തീരുമാനം കൈകൊണ്ടു.
ഒപ്പം കുടുംബങ്ങളുടെ പുനരധിവാസവുമായി ബന്ധപ്പെട്ട് ദേശിയപാത അതോററ്റിയുടെ കൂടി പങ്കാളിത്തം ഉണ്ടാകുന്നതിനായുള്ള ഇടപെടല് നടത്താനും സര്വ്വകക്ഷിയോഗത്തില് തീരുമാനമായി. ദുരന്തത്തില് മരണപ്പെട്ട ബിജുവിന്റെ കുടുംബത്തിന് അടിയന്തിര ധനസഹായം എത്തിക്കുന്നതിനായുള്ള ഇടപെടലിനും സര്വ്വകക്ഷിയോഗം തീരുമാനം കൈകൊണ്ടു.
ഇക്കാര്യങ്ങളിലൊക്കെയും തീരുമാനം കൈകൊള്ളുന്നതിന് ജനപ്രതിനിധികളുടെയും ഉദ്യോഗസ്ഥരുടെയും നേതൃത്വത്തില് ഉന്നതതല യോഗം ചേരുന്നതിനായുള്ള നിര്ദ്ദേശം സമര്പ്പിക്കാനും സര്വ്വകക്ഷിയോഗത്തില് ധാരണയായി.ദുരന്തമുഖത്തുള്ള കുടുംബങ്ങള്ക്ക് ഏറ്റവും വേഗത്തില് തുടര് സഹായങ്ങള് ലഭ്യമാക്കണമെന്ന ആവശ്യം യോഗത്തില് ഉയര്ന്നു.മണ്ണിടിച്ചില് ഭീഷണിയെ തുടര്ന്ന് പ്രദേശത്ത് നിന്നും മാറ്റപ്പെട്ടിട്ടുള്ള കുടുംബങ്ങളുടെ അവസ്ഥയും പ്രദേശത്ത് നിലനില്ക്കുന്ന സുരക്ഷാ ഭീഷണിയും സര്വ്വകക്ഷിയോഗത്തില് വിശകലനം ചെയ്തു.
