മാങ്കുളം: മാങ്കുളം പെരുമ്പന്‍കുത്തില്‍ പുഴയില്‍ ഇറങ്ങിയ യുവാവ് മുങ്ങി മരിച്ചു. എറണാകുളം പെരുമ്പടപ്പ് സ്വദേശി പള്ളിപ്പറമ്പില്‍ മെലൂസ് ജൂഡാ(43)ണ് മരണപ്പെട്ടത്. വ്യാഴാഴിച്ച ഉച്ചക്ക് ശേഷമായിരുന്നു ശേഷമായിരുന്നു സംഭവം നടന്നത്. മരണപ്പെട്ട യുവാവ് സുഹൃത്തുമൊന്നിച്ച് രണ്ട് ദിവസങ്ങള്‍ക്ക് മുമ്പാണ് മൂന്നാറില്‍ എത്തിയത്. എറണാകുളത്തേക്കുള്ള മടക്കയാത്രക്കിടെയാണ് വ്യാഴാഴിച്ച മാങ്കുളത്തെത്തിയത്. പുഴയരികില്‍ വാഹനം നിര്‍ത്തിയ ശേഷം മെലൂസ് ജൂഡ് വസ്ത്രം മാറി പുഴയിലേക്കിറങ്ങിയെന്നും പുഴയുടെ അപകടം നിറഞ്ഞ ഭാഗത്തേക്ക് മെലൂസ് ജൂഡ് നീങ്ങുന്നത് കരയില്‍ നിന്ന് താന്‍ വിലക്കിയിട്ടും യുവാവ് മുഖവിലക്കെടുത്തില്ലെന്നും മരണപ്പെട്ട യുവാവിന് ഒപ്പമുണ്ടായിരുന്ന സുഹൃത്ത് പറഞ്ഞു. തുടര്‍ന്ന് മെലൂസ് ജൂഡ് പുഴയില്‍ മുങ്ങിയതോടെ സമീപവാസികള്‍ എത്തുകയും പുഴയില്‍ നിന്ന് യുവാവിനെ കരക്കെത്തിക്കുകയും ചെയ്തു. പിന്നീട് ഇയാളെ അടിമാലി താലൂക്കാശുപത്രിയില്‍ എത്തിച്ചെങ്കിലും മരണം സംഭവിച്ചു. മൃതദേഹം തുടര്‍ നടപടികള്‍ക്കായി മോര്‍ച്ചറിയിലേക്ക് മാറ്റി.
