മൂന്നാര്‍: മൂന്നാര്‍ കല്ലാറിലെ മാലിന്യ സംസ്‌ക്കരണ പ്ലാന്റിന് സമീപത്തെ കാട്ടാനകളുടെ സാന്നിധ്യം ഒഴിയുന്നില്ല. ഒറ്റക്കൊമ്പനെന്ന് വിളിപ്പേരുള്ള കാട്ടാന വീണ്ടും കഴിഞ്ഞ ദിവസം മാലിന്യ സംസ്‌ക്കരണ പ്ലാന്റിന്റെ പരിസരത്തെത്തി. മൂന്നാര്‍ ഗ്രാമപഞ്ചായത്തിന്റെ കല്ലാറിലുള്ള മാലിന്യ സംസ്‌ക്കരണ കേന്ദ്രത്തിന് സമീപത്തെ കാട്ടാന ശല്യം കഴിഞ്ഞ കുറെക്കാലങ്ങളായി നിലനില്‍ക്കുന്നതാണ്. മുമ്പ് കാട്ടുകൊമ്പന്‍ പടയപ്പ ഈ മേഖലയില്‍ സ്ഥിര സാന്നിധ്യമായിരുന്നു.ഇതിന് ശേഷമാണിപ്പോള്‍ ഒറ്റകൊമ്പനെന്ന് വിളിപ്പേരുള്ള കാട്ടാന മാലിന്യ സംസ്‌ക്കരണ കേന്ദ്രത്തിന് സമീപം ഇടക്കിടെ എത്തുന്ന സ്ഥിതിയുണ്ടായിട്ടുള്ളത്.
കഴിഞ്ഞ ദിവസവും ഒറ്റകൊമ്പന്‍ ഈ മേഖലയില്‍ എത്തി.ദിവസങ്ങള്‍ക്ക് മുമ്പ് മാലിന്യ സംസ്‌ക്കരണ പ്ലാന്റിന് സമീപത്തുണ്ടായ കാട്ടാന ആക്രമണത്തില്‍ രണ്ട് പേര്‍ക്ക് പരിക്ക് സംഭവിച്ചിരുന്നു.കേന്ദ്രത്തിലെ തൊഴിലാളികള്‍ക്കായിരുന്നു പരിക്ക് സംഭവിച്ചത്.മാലിന്യ സംസ്‌ക്കരണ കേന്ദ്രത്തിന് സമീപത്തു നിന്നടക്കം ജനവാസമേഖലകളില്‍ ഇറങ്ങി സ്വരൈ്യവിഹാരം നടത്തുന്ന കാട്ടാനകളെ തുരത്തണമെന്ന ആവശ്യം ശക്തമാണ്.തോട്ടം മേഖലയിലെ കുടുംബങ്ങള്‍ രാപകല്‍ വ്യത്യാസമില്ലാതെ ഇപ്പോള്‍ കാട്ടാന ഭീതിയിലാണ് കഴിഞ്ഞ് കൂടുന്നത്.
