ദേശീയപാതയോരത്തെ അപകടസാധ്യതാ മരം മുറിക്കാൻ കയറിയ യുവാവ് കാൽവഴുതി വീണ് മരിച്ചു
അടിമാലി: ദേശീയപാതയോരത്തെ അപകടസാധ്യതാ മരം മുറിക്കാൻ കയറിയ യുവാവ് കാൽവഴുതി വീണ് മരിച്ചു. മറയൂർ മേലാടി സ്വദേശി രാമറിൻ്റെ മകൻ സുരേഷ് കുമാർ (38) ആണ് മരിച്ചത്. വ്യാഴാഴ്ച രാവിലെയാണ് സംഭവം. കൊച്ചി-ധനുഷ്കോടി ദേശീയ പാതയിൽ വാളറക്കു സമീപം കല്ലത്താൻപടിയിലാണ് അപകടം നടന്നത്. മേഖലയിൽ ദേശീയപാതാ പുനരുദ്ധാരണ പ്രവർത്തനങ്ങൾ നടന്നു വരികയാണ്. ഇതിൻ്റെ ഭാഗമായി പാതയോരങ്ങളിലെ അപടസാധ്യതയുള്ള മരങ്ങൾ മുറിച്ചു മാറ്റാൻ തൃശൂർ സ്വദേശിക്ക് സബ് കോൺട്രാക്ട് നൽകിയിരുന്നു. ഇവരോടൊപ്പം ഇന്നലെ ആദ്യമായാണ് സുരേഷ് ജാേലിക്കെത്തിയത്. അപകടം നടന്നയുടൻ സഹതൊഴിലാളികൾ തൊടുപുഴയിലെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഏതാനും നാൾ മുൻപ് ഇദ്ദേഹം മറ്റൊരു ജോലിസ്ഥലത്തും മരത്തിൽ നിന്നും വീണ് പരിക്കേറ്റ് ചികിത്സക്കു ശേഷം പണിക്ക് പോയി തുടങ്ങിയതേയുള്ളു. സംസ്കാരം പിന്നീട് മേലാടി പൊതു ശ്മശാനത്തിൽ.
