രാത്രിയില്‍ വാഹനം പാര്‍ക്ക് ചെയ്തതെവിടെയെന്ന് മറന്നു; അടിമാലിയില്‍ ഡ്രൈവര്‍ പുലിവാല് പിടിച്ചു
അടിമാലി: രാത്രിയില്‍ വാഹനം പാര്‍ക്ക് ചെയ്തതെവിടെയാണെന്ന് മദ്യലഹരിയില്‍ മറന്നു പോയാല്‍ എന്തു ചെയ്യും. ആകെ പുലിവാല് പിടിക്കും. അത്തരമൊരു സംഭവം ഉണ്ടായി അടിമാലിയില്‍. നാഷണല്‍ പെര്‍മിറ്റ് ലോറി നിര്‍ത്തിയിട്ടതെവിടെയെന്ന് മറന്നു പോയതോടെയാണ് അടിമാലിയില്‍ ഡ്രൈവര്‍ പുലിവാല് പിടിച്ചത്. ദേശിയപാതയോരത്ത് അടിമാലി സര്‍ക്കാര്‍ ഹൈസ്‌ക്കൂള്‍ പരിസരത്തായിരുന്നു ഇന്നലെ രാത്രി 11 മണിയോടെ ഡ്രൈവര്‍ നാഷണല്‍ പെര്‍മിറ്റ് ലോറി സാധനങ്ങളുമായി വന്ന് നിര്‍ത്തിയിട്ടത്.പിന്നീട് ഡ്രൈവര്‍ താമസിക്കുവാനായി ടൗണിന്റെ മറ്റൊരു ഭാഗത്തേക്ക് പോയി. രാവിലെ ഉണര്‍ന്ന ഡ്രൈവര്‍ താമസ സ്ഥലത്തിനരികെ നോക്കിയപ്പോള്‍ ലോറി കണ്ടില്ല.
താമസ സ്ഥലത്തിനരികെയാണ് താന്‍ വാഹനം പാര്‍ക്ക് ചെയ്തതെന്നും പാര്‍ക്ക് ചെയ്ത ലോറി മോഷണം പോയതാണെന്നും ഡ്രൈവര്‍ കരുതി. വാഹനം മോഷണം പോയതാണെന്ന് പറഞ്ഞ് ഡ്രൈവര്‍ അടിമാലി പോലീസിനെ സമീപിച്ചു.പിന്നീട് നടത്തിയ അന്വേഷണത്തില്‍ ഡ്രൈവര്‍ തന്നെ വാഹനം ദേശിയപാതയോരത്ത് നിര്‍ത്തിയിട്ടതാണെന്നും വാഹനം എവിടാണ് നിര്‍ത്തിയിട്ടതെന്ന് ഡ്രൈവര്‍ മറന്നു പോയതാണ് സംഭവത്തിന് ഇടയാക്കിയതെന്നും കണ്ടെത്തി. എന്തായാലും മോഷണം പോയെന്ന് ആവലാതിപ്പെട്ട വാഹനവുമായി ഡ്രൈവര്‍ പിന്നീട് അടിമാലിയില്‍ നിന്നും മടങ്ങി.
