അടിമാലി: ദേശിയപാത85 ന്റെ ഭാഗമായ കൊച്ചി മൂന്നാര്‍ പാതയുടെ നവീകരണ ജോലികള്‍ പൂര്‍ത്തിയാകുന്നതോടെ 2 ഇടങ്ങളില്‍ ടോള്‍ പ്ലാസ ഉയരും. ഇതോടൊപ്പം വനം വകുപ്പുമായി ബന്ധപ്പെട്ടുള്ള തര്‍ക്കത്തെ തുടര്‍ന്ന് മുടങ്ങിക്കിടന്ന നേര്യമംഗലം മുതല്‍ വാളറ വരെയുള്ള ദൂരത്തിലെ നവീകരണ പ്രവൃത്തികള്‍ ആരംഭിക്കുന്നതിന്റെ ഭാഗമായി കാട്ടാനകളുടെ സഞ്ചാരം സുഗമമാക്കുന്നതിന് 2 ഇടങ്ങളില്‍ റാംപ് നിര്‍മ്മിക്കുന്നതിനും ധാരണയായി.
ദേശിയപാതയുടെ നവീകരണ ജോലികള്‍ വളരെ വേഗത്തില്‍ പുരോഗമിക്കുകയാണ്. റോഡ് നിര്‍മ്മാണം പൂര്‍ത്തിയാകുന്നതോടെ മൂന്നാറിന്റെ വിനോദ സഞ്ചാര മേഖലക്കത് കൂടുതല്‍ കരുത്താകും. പാതയുടെ നവീകരണ ജോലികള്‍ പൂര്‍ത്തിയാകുന്നതോടെ 2 ഇടങ്ങളില്‍ ടോള്‍ പ്ലാസ ഉയരും. എറണാകുളം ജില്ലയിലെ കവളങ്ങാടും മൂന്നാറിന് സമീപവുമാണ് ടോള്‍ പ്ലാസ സ്ഥാപിക്കുന്നതിന് എന്‍എച്ച്എഐ അധികൃതര്‍ നടപടി സ്വീകരിച്ചിരിക്കുന്നത്. മൂന്നാര്‍ ഗ്യാപ്പ് റോഡില്‍ ദേവികുളത്തിനു സമീപം ലാക്കാട് ഇപ്പോള്‍ ടോള്‍ പ്ലാസ പ്രവര്‍ത്തിക്കുന്നുണ്ട്. ഇതു കൂടാതെയാണ് മൂന്നാറിന് സമീപം പള്ളിവാസലില്‍ മറ്റൊരു ടോള്‍ പ്ലാസ കൂടി സ്ഥാപിക്കുന്നത്.
ഇതോടൊപ്പം വനം വകുപ്പുമായി ബന്ധപ്പെട്ടുള്ള തര്‍ക്കത്തെ തുടര്‍ന്ന് മുടങ്ങിക്കിടന്ന നേര്യമംഗലം മുതല്‍ വാളറ വരെയുള്ള ദൂരത്തിലെ നവീകരണ പ്രവൃത്തികള്‍ ആരംഭിക്കുന്നതിന്റെ ഭാഗമായി കാട്ടാനകളുടെ സഞ്ചാരം സുഗമമാക്കുന്നതിന് 2 ഇടങ്ങളില്‍ റാംപ് നിര്‍മ്മിക്കുന്നതിനും ധാരണയായി. വനമേഖലയിലെ നിര്‍മ്മാണ ജോലികള്‍ അടിയന്തരമായി പൂര്‍ത്തിയാക്കും വിധമാണ് നടപടി ക്രമങ്ങള്‍ പുരോഗമിക്കുന്നത്. റോഡിന്റെ നിര്‍മ്മാണ ജോലികള്‍ പൂര്‍ത്തിയാകുന്നതോടെ നേര്യമംഗലം വനമേഖലയിലെ ഗതാഗതകുരുക്കിനും പരിഹാരമാകും.
