പെരുമ്പന്‍കുത്ത് ആറാംമൈല്‍ അമ്പതാംമൈല്‍ റോഡ് നിര്‍മ്മാണം; ജോലികള്‍ പൂര്‍ത്തീകരിക്കാത്തതിനെതിരെ 27മുതല്‍ നിരാഹാര സമരം
അടിമാലി: മാങ്കുളം പഞ്ചായത്തിലെ പ്രധാന റോഡുകളില്‍ ഒന്നായ പെരുമ്പന്‍കുത്ത് ആറാംമൈല്‍ അമ്പതാംമൈല്‍ റോഡിന്റെ നിര്‍മ്മാണ ജോലികള്‍ കരാറുകാരന് പൂര്‍ത്തീകരിക്കാത്തതില്‍ പ്രതിഷേധിച്ച് റോഡ് ആക്ഷന്‍ കൗണ്‍സില്‍ പ്രതിഷേധ സമരത്തിലേക്ക്. ആക്ഷന്‍ കൗണ്‍സലിന്റെ നേതൃത്വത്തില്‍ ഗ്രാമപഞ്ചായത്ത് വൈസ് പ്രസിഡന്റ് അനില്‍ കെ ആന്റണി ഈ മാസം 27 മുതല്‍ കോട്ടയത്തെ റീ ബില്‍ഡ് കേരള ഓഫീസിന് മുമ്പില്‍ അനിശ്ചിതകാല നിരാഹാര സമരം ആരംഭിക്കുമെന്ന് ആക്ഷന്‍ കൗണ്‍സില്‍ ഭാരവാഹികള്‍ അടിമാലിയില്‍ വാര്‍ത്താ സമ്മേളനത്തില്‍ അറിയിച്ചു.
റോഡ് നിര്‍മ്മാണം ഏറ്റവും വേഗത്തില്‍ പൂര്‍ത്തീകരിക്കണമെന്നാണ് റോഡ് ആക്ഷന്‍ കൗണ്‍സിലിന്റെയും പ്രദേശവാസികളുടെയും ആവശ്യം. പഞ്ചായത്തിലെ 2, 3, 4 വാര്‍ഡുകളിലായുള്ള ആയിരത്തി അഞ്ഞൂറോളം കുടുംബങ്ങള്‍ ആശ്രയിക്കുന്ന 4.2 കിലോമീറ്റര്‍ ദൂരം വരുന്ന ഈ റോഡ് 2018ലെ പ്രളയകാലത്തായിരുന്നു തകര്‍ന്നത്. 2019ലെ കാലവര്‍ഷം കൂടിയായതോടെ റോഡിന്റെ തകര്‍ച്ച പൂര്‍ണ്ണമായി. പിന്നീട് റീ ബില്‍ഡ് കേരളയില്‍ ഉള്‍പ്പെടുത്തി റോഡ് നിര്‍മ്മാണത്തിനായി തുക അനുവദിച്ച് 2022 മാര്‍ച്ച് 26ന് നിര്‍മ്മാണ ഉദ്ഘാടനം നടത്തുകയും ചെയ്തു. 270 ദിവസങ്ങള്‍ക്കുള്ളില്‍ നിര്‍മ്മാണ ജോലികള്‍ പൂര്‍ത്തീകരിക്കണമെന്നായിരുന്നു കരാര്‍. എന്നാല്‍ നിര്‍മ്മാണമാരംഭിച്ച് മൂന്ന് വര്‍ഷത്തോടടുക്കുമ്പോഴും ടാറിംഗ് ജോലികള്‍ പൂര്‍ത്തീകരിക്കാന്‍ കരാറുകാരന് കഴിഞ്ഞിട്ടില്ല. റോഡിന്റെ മണ്‍ജോലികള്‍ നടത്തുകയും മെറ്റല്‍ വിരിക്കുകയും ചില കലുങ്കുകളുടെ നിര്‍മ്മാണം നടത്തുകയും ചെയ്തിരുന്നു. ടാറിംഗ് ജോലികളും ഓടകളുടെയും മറ്റും നിര്‍മ്മാണ ജോലികളും ചിലയിടങ്ങളില്‍ ടൈല്‍ വിരിക്കേണ്ട ജോലികളുമാണ് അവശേഷിക്കുന്നത്. റോഡില്‍ ഉറപ്പിച്ച മെറ്റലുകള്‍ ഇളകിയതോടെ പ്രദേശത്തേക്കുള്ള യാത്ര ദുഷ്‌ക്കരമായി.
ഇരുചക്രവാഹനങ്ങള്‍ മറിഞ്ഞ് പരിക്ക് സംഭവിക്കുന്നവരുടെ എണ്ണം ഏറുകയാണ്.പഞ്ചായത്തിലെ ഏക സര്‍ക്കാര്‍ വിദ്യാലയമായ ചിക്കണംകുടി സ്‌കൂളിലേക്കുള്ള ഏക റോഡ് കൂടിയാണ് നിര്‍മ്മാണം പൂര്‍ത്തീകരിക്കാതെ കിടക്കുന്നത്.6 ആദിവാസി ഇടങ്ങളിലെ കുടുംബങ്ങളും ഈ റോഡിനെ ആശ്രയിക്കുന്നുണ്ട്. കാല്‍നടയാത്ര പോലും ദുസഹമായ റോഡിലൂടെയാണ് ആളുകള്‍ ചികിത്സാ സംബന്ധമായ ആവശ്യങ്ങള്‍ക്കുള്‍പ്പെടെ പുറം ലോകത്തേക്ക് യാത്ര ചെയ്യുന്നത്. ഇളകി കിടക്കുന്ന റോഡിലൂടെ സഞ്ചരിക്കുന്ന വാഹനങ്ങള്‍ക്കും തകരാര്‍ സംഭവിക്കുന്നത് പതിവാണ്. മുമ്പ് ഈ മേഖലയിലേക്കുണ്ടായിരുന്ന സ്‌കൂള്‍ ബസുകള്‍ റോഡ് യാത്രാ യോഗ്യമല്ലാതായതോടെ സര്‍വ്വീസുകള്‍ നിര്‍ത്തി. ഈ റോഡില്‍ കരാറുകാരന് നടത്തിയ നിര്‍മ്മാണ ജോലികളുടെ ചില ബില്ലുകള്‍ മാറി പണം ലഭിച്ചുവെന്നും റോഡിന്റെ നിര്‍മ്മാണ ജോലികള്‍ ഉടന്‍ പൂര്‍ത്തീകരിക്കാമെന്ന് ഈ ഘട്ടത്തില്‍ കരാറുകാരന് നല്‍കിയ ഉറപ്പ് പാലിക്കപ്പെട്ടില്ലായെന്നും റോഡ് ആക്ഷന്‍ കൗണ്‍സില്‍ ഭാരവാഹികള്‍ ആരോപിച്ചു.ഈ സാഹചര്യത്തിലാണ് റോഡ് ആക്ഷന്‍ കൗണ്‍സില്‍ പ്രതിഷേധ പരിപാടികളിലേക്ക് കടക്കുന്നതെന്നും മാങ്കുളം ഗ്രാമപഞ്ചായത്ത് പ്രസിഡന്റ് ഗീത ആനന്ദന്‍, വൈസ് പ്രസിഡന്റ് അനില്‍ കെ ആന്റണി, ഗ്രാമപഞ്ചായത്തംഗങ്ങളായ റിനേഷ് തങ്കച്ചന്‍, എ കെ സുധാകരന്‍,റോഡ് ആക്ഷന്‍ കൗണ്‍സില്‍ അംഗങ്ങളായ ജിസ് തങ്കപ്പന്‍, സെബാസ്റ്റ്യന്‍ തോമസ്, എ കെ ശശികുമാര്‍, വിശാലം മുരളി എന്നിവര്‍ വാര്‍ത്താ സമ്മേളനത്തില്‍ അറിയിച്ചു.
