അടിമാലി: ബൈസൺവാലിക്ക് സമീപം ഗ്യാപ്പ് റോഡ് ബൈസൺവാലി റൂട്ടിൽ ഉണ്ടായ വാഹനാപകടത്തിൽ ഒരാൾ മരിച്ചു. സ്കൂട്ടർ നിയന്ത്രണം വിട്ട് മറിഞ്ഞാണ് അപകടം സംഭവിച്ചത്. മലപ്പുറം ചങ്ങരംകുളം സ്വദേശി റാഷിദ് ആണ് മരണപ്പെട്ടത്. മറ്റൊരാൾക്ക് അപകടത്തിൽ പരിക്ക് സഭംവിച്ചു. ഇന്നുച്ചക്ക് ശേഷമായിരുന്നു അപകടം നടന്നത്. മലപ്പുറത്തു നിന്നും മൂന്നാറിലേക്ക് വിനോദ സഞ്ചാരത്തിനെത്തിയ സംഘത്തിൽപ്പെട്ട യുവാക്കളാണ് അപകടത്തിൽപ്പെട്ടത്. ഇന്നലെ മലപ്പുറത്തു നിന്നും പുറപ്പെട്ട ഇവർ ആനയിറങ്കൽ അണക്കെട്ടുൾപ്പെടെ സന്ദർശിച്ച ശേഷം തിരികെ മടങ്ങുന്നതിനിടെ ഗ്യാപ്പ് റോഡ് ബൈസൺവാലി റൂട്ടിൽ വച്ച് റാഷിദും ഒപ്പമുണ്ടായിരുന്നയാളും സഞ്ചരിച്ച സ്കൂട്ടർ അപകടത്തിൽപ്പെടുകയായിരുന്നു. കുത്തിറക്കത്തിൽ വച്ച് നിയന്ത്രണം നഷ്ടപ്പെട്ട സ്കൂട്ടർ റോഡരികിലെ ഏലത്തോട്ടത്തിലേക്ക് പതിച്ചു. ഉടൻ റാഷിദിനെ അടിമാലി താലൂക്കാശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. റാഷിദിനൊപ്പം സഞ്ചരിച്ചിരുന്ന സുവിത്തിനും പരിക്ക് സംഭവിച്ചു. മൂന്ന് ഇരുചക്ര വാഹനങ്ങളിലായിട്ടായിരുന്നു 6 അംഗ സംഘം മലപ്പുറത്തു നിന്നും മൂന്നാറിലെത്തിയത്.ഇവർ മുമ്പ് ഒരുമിച്ച് പഠിച്ചിരുന്നവരാണ്. റാഷിദിൻ്റെ മൃതദേഹം തുടർ നടപടികൾക്കായി മോർച്ചറിയിലേക്ക് മാറ്റി.
