ബേക്കേഴ്‌സ് അസോസിയേഷന്‍ കേരള ഇടുക്കി ജില്ലാ കണ്‍വന്‍ഷനും കുടുംബസംഗമവും ഈ മാസം 10ന് അടിമാലിയില്‍ നടക്കും
അടിമാലി: ബേക്കേഴ്‌സ് അസോസിയേഷന്‍ കേരളയുടെ ഇടുക്കി ജില്ലാ കണ്‍വന്‍ഷനും കുടുംബസംഗമവും ഈ മാസം 10ന് അടിമാലിയില്‍ നടക്കും. അടിമാലി ക്ലബ്ബ് ഓഡിറ്റോറിയത്തിലാണ് പരിപാടി ക്രമീകരിച്ചിട്ടുള്ളത്. രാവിലെ 10ന് ജില്ലാ കണ്‍വന്‍ഷന്‍ നടക്കും. ജലവിഭവ വകുപ്പ് മന്ത്രി റോഷി അഗസ്റ്റിന്‍ കണ്‍വന്‍ഷന്‍ ഉദ്ഘാടനം ചെയ്യുമെന്ന് സംഘടനാ ഭാരവാഹികള്‍ അടിമാലിയില്‍ വാര്‍ത്താ സമ്മേളനത്തില്‍ പറഞ്ഞു.
വിദ്യാഭ്യാസ മേഖലയില്‍ ഉന്നത വിജയം നേടിയ സംഘടനാംഗങ്ങളുടെ കുട്ടികളെ ചടങ്ങില്‍ അനുമോദിക്കും. അഡ്വ. ഡീന്‍ കുര്യാക്കോസ് എം പി അനുമോദന ചടങ്ങ് നിര്‍വ്വഹിക്കും. ഡെന്റ് കെയര്‍ മാനേജിംഗ് ഡയറക്ടര്‍ ജോണ്‍ കുര്യാക്കോസ് ചടങ്ങില്‍ മുഖ്യപ്രഭാഷണം നടത്തും. സംഘടനാ ജില്ലാ പ്രസിഡന്റ് സി ആര്‍ സന്തോഷ് അധ്യക്ഷനാകും.
കണ്‍വന്‍ഷന്റെ ഭാഗമായി ബേക്കറി എക്‌സ്‌പോയും നടക്കും. ഇതിന്റെ ഭാഗമായി മുപ്പത്തഞ്ചോളം സ്റ്റാളുകള്‍ ക്രമീകരിക്കുമെന്നും സംഘടനാ ഭാരവാഹികള്‍ വാര്‍ത്താ സമ്മേളനത്തില്‍ വ്യക്തമാക്കി. ബേക്കേഴ്‌സ് അസോസിയേഷന്‍ കേരളയുടെ പത്താമത് ഇടുക്കി ജില്ലാ സമ്മേളനമാണ് ഇത്തവണ അടിമാലിയില്‍ നടക്കുന്നത്.
ഇന്ത്യന്‍ ബേക്കേഴ്‌സ് ഫെഡറേഷന്‍ സ്ഥാപക പ്രസിഡന്റ് പി എം ശങ്കരന്‍, ബേക്കേഴ്‌സ് അസോസിയേഷന്‍ കേരള സംസ്ഥാന പ്രസിഡണ്ട് കിരണ്‍ എസ് പാലക്കല്‍, സംസ്ഥാന ജനറല്‍ സെക്രട്ടറി ബിജു പ്രേംശങ്കര്‍, സ്റ്റേറ്റ് സെക്രട്ടറി ഡോണ്‍ ബേസില്‍ കുര്യന്‍ എന്നിവര്‍ ജില്ലാ കണ്‍വന്‍ഷനില്‍ പങ്കെടുക്കും.
ബേക്കറി വ്യവസായത്തിലേക്ക് പുതിയതായി കടന്നുവരാന്‍ ആഗ്രഹിക്കുന്നവര്‍ക്ക് സഹായകരമാകുന്ന നിലയിലാണ് ബേക്കറി എക്‌സ്‌പോ ക്രമീകരിക്കാന്‍ ലക്ഷ്യമിട്ടിട്ടുള്ളതെന്നും എക്‌സ്‌പോയിലെ സ്റ്റാളുകള്‍ സന്ദര്‍ശിക്കുന്നതിന് ഏവരേയും അടിമാലി ക്ലബ്ബ് ഓഡിറ്റോറിയത്തിലേക്ക് സ്വാഗതം ചെയ്യുന്നതായും ജില്ലാ പ്രസിഡന്റ് സി ആര്‍ സന്തോഷ്, ജില്ല ജനറല്‍ സെക്രട്ടറി ദിലീപ് എന്‍വീസ് തുടങ്ങിയ സംഘടനാ ഭാരവാഹികള്‍ അറിയിച്ചു.
