മൂന്നാര്‍ ടൗണില്‍ ആര്‍ ഒ ജംഗ്ഷന്‍ ഭാഗത്ത് കുഴി രൂപം കൊണ്ട പാലത്തിലൂടെയുള്ള യാത്രക്ക് നിയന്ത്രണം
മൂന്നാര്‍: മൂന്നാര്‍ ടൗണില്‍ ആര്‍ ഒ ജംഗ്ഷന്‍ ഭാഗത്ത് കുഴി രൂപം കൊണ്ട പാലത്തിലൂടെയുള്ള യാത്രക്ക് നിയന്ത്രണം. ടൗണില്‍ ആര്‍ ഒ ജംഗ്ഷന്‍ ഭാഗത്തു നിന്നും മാട്ടുപ്പെട്ടി, ദേവികുളം ഭാഗങ്ങളിലേക്ക് പോകുന്നിടത്താണ് പഴയ പാലം സ്ഥിതി ചെയ്യുന്നത്. ഈ പാലത്തിലാണ് വലിയ കുഴി രൂപം കൊണ്ടത്. മഴ പെയ്യുക കൂടി ചെയ്തതോടെ കുഴി വലിപ്പമാര്‍ജ്ജിക്കുകയും വെള്ളക്കെട്ട് രൂപം കൊള്ളുകയും ചെയ്തു.
ഭാരവാഹനങ്ങളും ബസുകളുമൊക്കെ ഈ കുഴിയില്‍ ചാടുമ്പോള്‍ പാലം നിരന്തരം കുലുങ്ങുന്നതും ആശങ്ക ഉയര്‍ത്തിയ സാഹചര്യത്തിലാണ് പഴയ പാലത്തിലൂടെയുള്ള യാത്രക്ക് നിയന്ത്രണം ഏര്‍പ്പെടുത്തിയത്. ഈ പാലത്തിന് സമീപത്തു തന്നെയുള്ള പുതിയ പാലത്തിലൂടെ ഇരുവശങ്ങളിലേക്കും ഗതാഗതം ക്രമീകരിച്ചാണ് കുഴി രൂപം കൊണ്ട പാലം താല്‍ക്കാലികമായി അടച്ചത്. അതേ സമയം പാലത്തിന്റെ അറ്റകുറ്റപ്പണികള്‍ വേഗത്തില്‍ പൂര്‍ത്തീകരിക്കണമെന്നും അല്ലാത്ത പക്ഷം ഓണക്കാലമാകുമ്പോഴേക്കും ടൗണില്‍ ഗതാഗത കുരുക്ക് രൂക്ഷമാകുമെന്നും വാദമുയരുന്നു.
കുഴി രൂപം കൊണ്ടപ്പോള്‍ തന്നെ അടക്കാന്‍ നടപടി സ്വീകരിക്കാത്തതാണ് കാര്യങ്ങള്‍ ഇത്രത്തോളം സങ്കീര്‍ണ്ണമാക്കിയതെന്ന ആക്ഷേപം ഉയരുന്നുണ്ട്. വര്‍ഷങ്ങള്‍ക്ക് മുമ്പ് ബ്രിട്ടിഷു കാരാണ് മുതിരപ്പുഴക്ക് കുറുകെ മൂന്നാറിനെയും മാട്ടുപ്പെട്ടി, ദേവികുളം മേഖലകളെയും ബന്ധിപ്പിക്കുന്ന ഈ ഇരുമ്പുപാലം നിര്‍മിച്ചത്. കരിങ്കല്‍ തൂണുകളില്‍ ഇരുമ്പുപാളികള്‍ നിരത്തിയാണ് പാലം നിര്‍മിച്ചത്. സൈന്യം നിര്‍മ്മിക്കുന്ന ബെയ്‌ലി പാലത്തിനു സമാനമായുള്ള സാങ്കേതിക വിദ്യയിലായിരുന്നു നിര്‍മിതി. ഓണാവധി എത്തും മുമ്പെ പാലത്തിന്റെ അറ്റകുറ്റപ്പണികള്‍ പൂര്‍ത്തീകരിക്കണമെന്നാണ് ആവശ്യം.
