മാങ്കുളത്ത് വനംവകുപ്പിനെതിരെ റിലേ സത്യാഗ്രഹസമരത്തിന് ആഹ്വാനം ചെയ്ത് ജനകീയ സമര സമിതി, സമരം ആരംഭിക്കുക മാര്‍ച്ച് 4ന്
മാങ്കുളം: മാങ്കുളത്തെ വന്യജീവി ശല്യം നിയന്ത്രിക്കുക, മാങ്കുളം ഡി എഫ് ഒക്കെതിരെ നടപടിയെടുക്കുക തുടങ്ങി വിവിധ ആവശ്യങ്ങള്‍ ഉന്നയിച്ചുള്ള മാങ്കുളം ജനകീയ സമരസമിതിയുടെ തുടര്‍ സമരം മാര്‍ച്ച് 4 മുതല്‍. ശനിയാഴ്ച്ച മാങ്കുളത്ത് നടന്ന സമര സമിതിയുടെ സമര പ്രഖ്യാപന കണ്‍വന്‍ഷനിലാണ് തീരുമാനം കൈകൊണ്ടത്. പ്രശ്‌ന പരിഹാരം കാണും വരെ ഡി എഫ് ഒ ഓഫീസിന് മുമ്പില്‍ റിലേ സത്യാഗ്രഹ സമരവുമായി മുമ്പോട്ട് പോകാനാണ് സമര സമിതിയുടെ തീരുമാനം. മാര്‍ച്ച് 4 ന് മാങ്കുളം ഗ്രാമപഞ്ചായത്ത് പ്രസിഡന്റിന്റെയും ഗ്രാമപഞ്ചായത്തംഗങ്ങളുടെയും നേതൃത്വത്തില്‍ റിലേ സമരത്തിന് തുടക്കം കുറിക്കും.
തുടര്‍ന്ന് ഓരോ വാര്‍ഡ് മെമ്പര്‍മാരുടെയും നേതൃത്വത്തില്‍ ബഹുജന പങ്കാളിത്തതോടെ സമരം തുടരും. വ്യാപാരി സംഘടനകളും വിവിധ കര്‍ഷക സംഘടനകളും മറ്റിതര സംഘടനകളും തുടര്‍ സമരത്തിന്റെ ഭാഗമാകും. വനം വകുപ്പിനെതിരെ ശക്തമായ പ്രതിരോധം തീര്‍ക്കാനാണ് സമര സമിതിയുടെ തീരുമാനം. ഡി എഫ് ഒ ഓഫീസിന് മുമ്പിലെ റിലേ സമരപരിപാടികള്‍ കൊണ്ട് പ്രശ്‌ന പരിഹാരമാകുന്നില്ലെങ്കില്‍ വനംവകുപ്പിലെ ഉന്നത ഉദ്യോഗസ്ഥരുടെ ഓഫീസിന് മുമ്പിലേക്ക് സമരം മാറ്റാനും തീരുമാനം കൈ കൊണ്ടിട്ടുണ്ട്. പ്രശ്‌നങ്ങള്‍ക്ക് പരിഹാരം കാണും വരെ തുടര്‍ സമരങ്ങളുമായി മുമ്പോട്ട് പോകുമെന്ന് സമര സമിതി നേതാക്കള്‍ പറഞ്ഞു.
മാങ്കുളത്ത് വനം വകുപ്പ് നടത്തുന്ന കടന്ന് കയറ്റം അവസാനിപ്പിക്കുക, മാങ്കുളത്തെ ഭൂമി പ്രശ്‌നങ്ങള്‍ പരിഹരിക്കുക, മലയോര ഹൈവേയുടെ അലൈന്‍മെന്റ് മാറ്റിയ നടപടി പുനപരിശോധിക്കുക, രാജപാത തുറക്കുക തുടങ്ങിയ ആവശ്യങ്ങളും സമര പ്രഖ്യാപന കണ്‍വന്‍ഷനിലൂടെ സമര സമിതി മുമ്പോട്ട് വയ്ക്കുന്നു.
മാങ്കുളം സര്‍വ്വീസ് സഹകരണ ബാങ്ക് ഓഡിറ്റോറിയത്തില്‍ നടന്ന സമര പ്രഖ്യാപന കണ്‍വന്‍ഷനില്‍ സമര സമിതി കണ്‍വീനറും മാങ്കുളം സെന്റ് മേരീസ് പള്ളി വികാരിയുമായ ഫാ. മാത്യു കരോട്ട് കൊച്ചറക്കല്‍ അധ്യക്ഷത വഹിച്ചു. മാങ്കുളം ഗ്രാമപഞ്ചായത്ത് പ്രസിഡന്റ് വിനീത സജീവന്‍, ഗ്രാമപഞ്ചായത്തംഗങ്ങള്‍, വിവിധ രാഷ്ട്രീയ പാര്‍ട്ടി പ്രതിനിധികള്‍, വ്യാപാരി സംഘടന പ്രതിനിധികള്‍, വിവിധ പള്ളികളിലെ വികാരിമാര്‍, കത്തോലിക്ക കോണ്‍ഗ്രസ് പ്രതിനിധികള്‍, സാമുദായിക സംഘടന പ്രതിനിധികള്‍, കര്‍ഷക സംഘടന പ്രതിനിധികള്‍, ജനകീയ സമര സമിതി ഭാരവാഹികള്‍ തുടങ്ങിയവര്‍ സംബന്ധിച്ചു.ചടങ്ങില്‍ വിവിധ രാഷ്ട്രീയ പാര്‍ട്ടികളും മറ്റിതര സംഘടനകളും ജനകീയ സമര സമിതിയുടെ തുടര്‍ സമരങ്ങള്‍ക്ക് പിന്തുണ പ്രഖ്യാപിച്ചു. മാങ്കുളം പെരുമ്പന്‍കുത്ത് വെള്ളച്ചാട്ടത്തിന് സമീപം ബ്ലോക്ക് പഞ്ചായത്ത് പണി കഴിപ്പിച്ച പവലിയനില്‍ വനംവകുപ്പിന്റെ ഇടപെടല്‍ ഉണ്ടായതിനെ തുടര്‍ന്നായിരുന്നു വനംവകുപ്പിനെതിരെ മാങ്കുളത്ത് പ്രത്യക്ഷ ബഹുജന സമരത്തിന് കളമൊരുങ്ങിയത്. ഹര്‍ത്താലും ഡി എഫ് ഒ ഓഫീസ് മാര്‍ച്ചുമെല്ലാം ജനകീയ സമര സമിതിയുടെ നേതൃത്വത്തില്‍ ആദ്യഘട്ടത്തില്‍ നടന്നിരുന്നു. ഇതിന്റെ രണ്ടാംഘട്ടമെന്നോണമാണ് സമര പ്രഖ്യാപന കണ്‍വന്‍ഷനിലൂടെ തുടര്‍ സമരപ്രഖ്യാപനം ഉണ്ടായിട്ടുള്ളത്.
