മൂന്നാര്‍: ദേവികുളം മേഖലയില്‍ കന്നുകാലികള്‍ പേവിഷ ബാധയേറ്റ് ചാകുന്നതില്‍ ആശങ്ക പടരുന്നു. മേഖലയില്‍ പത്തു ദിവസത്തിനിടെ 7 പശുക്കള്‍ ചത്തു. ദേവികുളം സ്വദേശികളായ മുനിയാണ്ടി, സുമേഷ് കുമാര്‍ എന്നിവരുടെ 3 കന്നുകാലികളാണ് ഇന്നലെ ചത്തത്. ഒരാഴ്ച്ച മുന്‍പ് 4 പശുക്കളും ഒരു നായയും ചത്തിരുന്നു.മേഖലയില്‍ കന്നുകാലികള്‍ പേവിഷ ബാധയേറ്റ് ചാകുന്നതില്‍ ആശങ്ക പകരുന്നുണ്ട്. വളര്‍ത്തുമൃഗങ്ങള്‍ ചത്തത് പേവിഷബാധയേറ്റാണെന്ന് വെറ്ററിനറി ഡോക്ടര്‍മാര്‍ നടത്തിയ പോസ്റ്റ്‌മോര്‍ട്ടത്തില്‍ കണ്ടെത്തി. ഒരു മാസം മുന്‍പ് ദേവികുളം ടൗണിനു സമീപം അലഞ്ഞുതിരിഞ്ഞു നടന്ന തെരുവുനായ നാട്ടുകാരെയും കന്നുകാലികളെയും കടിച്ചു പരുക്കേല്‍പിച്ചിരുന്നു. പിന്നീട് ഈ നായയെ പൊലീസ് സ്റ്റേഷനു സമീപം ചത്ത നിലയില്‍ കണ്ടെത്തി.
വായില്‍ നിന്ന് നുരയും പതയും ഒഴുകിയ നിലയിലായിരുന്നു നായ പ്രദേശത്ത് നടന്നിരുന്നത്. ഈ നായയുടെ കടിയേറ്റ കന്നു കാലികളും വളര്‍ത്തുനായയുമാണ് പിന്നീട് ചത്തതെന്നാണ് കരുതുന്നത്. കറവപ്പശുക്കളെയടക്കം തെരുവുനായ കടിച്ചു. കന്നുകാലികള്‍ ചാകുന്നതില്‍ നാട്ടുകാര്‍ പരിഭ്രാന്തിയിലായതോടെയാണ് പഞ്ചായത്ത് ഇന്നു മുതല്‍ പ്രതിരോധ കുത്തിവയ്പ് സംവിധാനമൊരുക്കിയത്.
