ക്യാന്‍സര്‍ ബാധിതയില്‍ നിന്ന് പണം കവര്‍ന്ന സംഭവം; ദിവസങ്ങള്‍ പിന്നിട്ടിട്ടും പ്രതിയെക്കുറിച്ച് സൂചനയില്ലാതെ പൊലീസ്.
അടിമാലി: അടിമാലിയില്‍ അര്‍ബുധ ബാധിതയായ വീട്ടമ്മയെ കെട്ടിയിട്ട് പണം കവര്‍ന്ന കേസില്‍ പോലീസിനിനിയും പ്രതിയെ കണ്ടെത്താനായിട്ടില്ല. കേസില്‍ അന്വേഷണം കൂടുതല്‍ ഊര്‍ജ്ജിതമാക്കുന്നതിന്റെ ഭാഗമായി കഴിഞ്ഞ ദിവസം പ്രത്യേക അന്വേഷണ സംഘത്തെ പോലീസ് നിയോഗിച്ചിരുന്നു. ഇടുക്കി ഡി വൈ എസ് പി യുടെ നേതൃത്വത്തില്‍ പത്തംഗസംഘമാണ് കേസന്വേഷിക്കുന്നത്.
കഴിഞ്ഞ ദിവസമായിരുന്നു ഉഷയുടെ വീട്ടില്‍ നിന്ന് പണം മോഷണം പോകുന്നത്. കീമോ തെറാപ്പിക്ക് ശേഷം വിശ്രമത്തിലായിരുന്ന ഉഷയുടെ വായില്‍ തുണിതിരുകി കയറ്റി കട്ടിലില്‍ കെട്ടിയിട്ട ശേഷമായിരുന്നു കവര്‍ച്ച നടത്തിയത്. രാവിലെ ഉഷയുടെ ഭര്‍ത്താവും മകളും പുറത്തുപോയ ശേഷമായിരുന്നു അജ്ഞാതന്‍ വീട്ടിനുള്ളില്‍ കയറി ഉഷയെ കെട്ടിയിട്ട് 16500 രൂപ കവര്‍ന്നത്. ചികിത്സക്കായി സുമനസ്സുകള്‍ സമാഹരിച്ച തുകയാണ് മോഷണം പോയത്. പിന്നീട് അയല്‍വാസികളെത്തിയപ്പോഴാണ് സംഭവം പുറം ലോകമറിഞ്ഞത്. പൊലീസ് സിസിടിവി കേന്ദ്രീകരിച്ച് അന്വേഷണം നടത്തിയെങ്കിലും യാതൊരു തുമ്പും ഉണ്ടായില്ലെന്നാണ് വിവരം.
