അടിമാലി: അടിമാലി ബസ് സ്റ്റാന്‍ഡിന്റെ വിവിധ ഭാഗങ്ങളില്‍ രൂപം കൊണ്ടിട്ടുള്ള കുഴികള്‍ വാഹനങ്ങള്‍ക്കും യാത്രകാര്‍ക്കും തലവേദനയാകുന്നു. ദിവസവും നിരവധിയായ സ്വകാര്യ ബസുകളും കെ എസ് ആര്‍ ടി സി ബസുകളും വന്നു പോകുന്ന ഇടമാണ് അടിമാലിയിലെ സ്വകാര്യ ബസ് സ്റ്റാന്‍ഡ്. വിദ്യാര്‍ത്ഥികളും വിനോദ സഞ്ചാരികളുമടക്കം ആയിരക്കണക്കിനാളുകളും ഇതു വഴി യാത്ര ചെയ്യുന്നു. ഇവര്‍ക്കൊക്കെയും ദുരിതം സമ്മാനിച്ചാണ് ബസ് സ്റ്റാന്‍ഡിലെ വിവിധ ഭാഗങ്ങളില്‍ കുഴികള്‍ രൂപം കൊണ്ടിട്ടുള്ളത്. മഴ പെയ്യുക കൂടി ചെയ്തതോടെ രൂപം കൊണ്ടിട്ടുള്ള കുഴികളില്‍ വെള്ളം നിറഞ്ഞ സ്ഥിതിയുണ്ട്. കോണ്‍ക്രീറ്റ് ചെയ്ത് ഈ കുഴികള്‍ നികത്താന്‍ നടപടി വേണമെന്നാണ് ആവശ്യം.
കുഴികളിലെ വെള്ളക്കെട്ടാണ് യാത്രക്കാരെ കൂടുതലായി വലക്കുന്നത്. വാഹനങ്ങള്‍ കുഴികളില്‍ ചാടുമ്പോള്‍ യാത്രക്കാരുടെ ശരീരത്ത് വെള്ളം തെറിക്കുന്നത് വാക്ക് തര്‍ക്കങ്ങള്‍ക്ക് വരെ ഇടവരുത്തുന്നു. മഴക്കാലമായതിനാല്‍ ദിവസം കഴിയുന്തോറും കുഴികളുടെ വിസ്തൃതിയും ആഴവും വര്‍ധിക്കുന്ന സ്ഥിതിയുമുണ്ട്. കുഴികള്‍ അടച്ച് സാറ്റാന്‍ഡിലെത്തുന്ന യാത്രക്കാരുടെ ദുരിതം ഒഴിവാക്കണമെന്നാണ് ആവശ്യം.
