അടിമാലി താലൂക്കാശുപത്രിയില്‍ പ്രസവ വാര്‍ഡ് സുരക്ഷിത ഇടത്തേക്ക് മാറ്റാനുള്ള നടപടി നീളുന്നു
അടിമാലി: ബലക്ഷയമുള്ളമുള്ള കെട്ടിടത്തില്‍ നിന്നും അടിമാലി താലൂക്കാശുപത്രിയില്‍ പ്രവര്‍ത്തിക്കുന്ന പ്രസവ വാര്‍ഡും പ്രസവ മുറിയും ബലക്ഷമതയുള്ള കെട്ടിടത്തിലേക്ക് മാറ്റുമെന്ന പ്രഖ്യാപനത്തിന്റെ തുടര്‍ നടപടികള്‍ ഇഴയുന്നു. നിലവില്‍ ഇപ്പോഴും പ്രസവ വാര്‍ഡും പ്രസവ മുറിയും പ്രവര്‍ത്തിക്കുന്നത് ബലക്ഷയം സംഭവിച്ച പഴയ കെട്ടിടത്തിലാണ്. ഒന്നര മാസം മുമ്പാണ് ബലക്ഷയമുള്ളമുള്ള കെട്ടിടത്തില്‍ നിന്നും അടിമാലി താലൂക്കാശുപത്രിയില്‍ പ്രവര്‍ത്തിക്കുന്ന പ്രസവ വാര്‍ഡും പ്രസവ മുറിയും ബലക്ഷമതയുള്ള കെട്ടിടത്തിലേക്ക് മാറ്റുമെന്ന പ്രഖ്യാപനം ഉണ്ടായത്.
നിലവില്‍ ക്യാഷ്വാലിറ്റി കെട്ടിടത്തിന് സമീപമുള്ള ബലക്ഷയമുള്ള പഴയ കെട്ടിടത്തിലാണ് പ്രസവ വാര്‍ഡും പ്രസവ മുറിയും പ്രവര്‍ത്തിക്കുന്നത്. ഈ കെട്ടിടത്തിന്റെ പല ഭാഗത്തും വിള്ളല്‍ സംഭവിച്ചിട്ടുണ്ട്. കെട്ടിട ഭാഗങ്ങള്‍ അടര്‍ന്ന് വീഴുന്ന സാഹചര്യവും നിലനില്‍ക്കുന്നു. ഇത്തരം സാഹചര്യങ്ങള്‍ പരിഗണിച്ചായിരുന്നു പഴയ കെട്ടിടത്തില്‍ നിന്നും ബലക്ഷമതയുള്ള കെട്ടിടത്തിലേക്ക് പ്രസവ വാര്‍ഡും പ്രസവ മുറിയും മാറ്റാന്‍ തീരുമാനം കൈകൊണ്ടത്. എന്നാല്‍ ദിവസങ്ങള്‍ പിന്നിട്ടിട്ടും ഇക്കാര്യത്തില്‍ വേണ്ടുന്ന തുടര്‍ നടപടികള്‍ ഇഴയുന്നുവെന്നാണ് ആക്ഷേപം. അതേ സമയം ഇതുമായി ബന്ധപ്പെട്ട നടപടികള്‍ പുരോഗമിക്കുന്നുവെന്നും വൈകാതെ പ്രശ്‌ന പരിഹാരം ഉണ്ടാകുമെന്നും ആശുപത്രി അധികൃതര്‍ അറിയിച്ചു.
