മണ്ണിടിച്ചിലില്‍ അകപ്പെട്ട് മരണപ്പെട്ട ഗണേശന്റെ കുടുംബത്തിന് സര്‍ക്കാര്‍ സഹായം ലഭ്യമാക്കണം
മൂന്നാര്‍: മൂന്നാര്‍ ദേവികുളം റോഡില്‍ ഉണ്ടായ മണ്ണിടിച്ചിലില്‍ അകപ്പെട്ട് മരണപ്പെട്ട ഗണേശന്റെ കുടുംബത്തിന് സര്‍ക്കാര്‍ സഹായം ലഭ്യമാക്കണമെന്നാവശ്യം. മൂന്നാര്‍ ദേവികുളം റോഡില്‍ ബൊട്ടാണിക്കല്‍ ഗാര്‍ഡന് സമീപം ഉണ്ടായ മണ്ണിടിച്ചിലില്‍ അകപ്പെട്ട് മരണമടഞ്ഞ മൂന്നാര്‍ അന്തോണിയാര്‍ നഗര്‍ സ്വദേശി ഗണേശന്റെ കുടുംബത്തിന്, സര്‍ക്കാര്‍ സഹായം പ്രഖ്യാപിക്കപ്പെടാത്ത സാഹചര്യത്തിലാണ് ഗണേശന്റെ കുടുംബത്തിന് ധനസഹായം ലഭ്യമാക്കാനുള്ള സര്‍ക്കാര്‍ ഇടപെടല്‍ വേണമെന്ന ആവശ്യമുയര്‍ന്നിട്ടുള്ളത്.
കഴിഞ്ഞ ശനിയാഴ്ച്ച രാത്രിയില്‍ മൂന്നാര്‍ ദേവികുളം റോഡിലൂടെ രാത്രി ലോറി ഓടിച്ചു വരുന്നതിനിടയിലാണ് ഗണേശനും വാഹനവും മണ്ണിടിച്ചിലില്‍ അകപ്പെട്ടത്. തുടര്‍ന്ന് രക്ഷാപ്രവര്‍ത്തകര്‍ ഗണേശനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഇതോടെ ഗണേശന്റെ കുടുംബത്തിന്റെ അത്താണി നഷ്ടപ്പെട്ടു. പ്രകൃതി ദുരന്തത്തില്‍പ്പെട്ട് മരണപ്പെട്ട ആളുടെ കുടുംബത്തിന് സര്‍ക്കാര്‍ ധനസഹായം പ്രഖ്യാപിക്കാത്തതിനെതിരേ പ്രതിഷേധവും ഉയരുന്നുണ്ട്.
വിഷയത്തില്‍ അടിയന്തിര നടപടി സ്വീകരിക്കണമെന്ന് കോണ്‍ഗ്രസ് മണ്ഡലം പ്രസിഡന്റ് സി നെല്‍സണ്‍ ആവശ്യപ്പെട്ടു. ദുരന്തം നടന്ന് ദിവസങ്ങള്‍ പിന്നിടുന്ന സാഹചര്യത്തില്‍ ഗണേശന്റെ കുടുംബത്തിന് സര്‍ക്കാര്‍ കൈതാങ്ങുണ്ടാകണമെന്നാണ് ആവശ്യം. ദുരന്ത നിവാരണ നിയമപ്രകാരം ധനസഹായത്തിന് അര്‍ഹതയുള്ള കുടുംബത്തെ അവഗണിക്കുന്ന സമീപനമുണ്ടായാല്‍ പ്രതിഷേധത്തിന് രൂപം നല്‍കുമെന്നും കോണ്‍ഗ്രസ് പ്രദേശിക നേതൃത്വം വ്യക്തമാക്കി.
