മൂന്നാര്‍ ടൗണില്‍ ആര്‍ ഒ ജംഗ്ഷന്‍ ഭാഗത്തെ പാലത്തില്‍ രൂപം കൊണ്ടിട്ടുള്ള കുഴി അടക്കാന്‍ ഇനിയും നടപടിയില്ല
മൂന്നാര്‍: മൂന്നാര്‍ ടൗണില്‍ ആര്‍ ഒ ജംഗ്ഷന്‍ ഭാഗത്തെ പാലത്തില്‍ രൂപം കൊണ്ടിട്ടുള്ള കുഴി അടക്കാന്‍ ഇനിയും നടപടിയില്ല. കുഴിയുടെ വലിപ്പം വര്‍ധിച്ചത് വാഹനയാത്രികര്‍ക്ക് തലവേദനയാകുകയാണ്. ടൗണില്‍ ആര്‍ ഒ ജംഗ്ഷന്‍ ഭാഗത്തു നിന്നും മാട്ടുപ്പെട്ടി, ദേവികുളം ഭാഗങ്ങളിലേക്ക് പോകുന്നിടത്താണ് പഴയ പാലം സ്ഥിതി ചെയ്യുന്നത്. മുമ്പ് ഇരു വശങ്ങളിലേക്കും ഇതു വഴി വാഹനങ്ങള്‍ കടന്നു പോയിരുന്നുവെങ്കിലും പഴയ പാലത്തിന് സമീപം പുതിയ പാലം നിര്‍മ്മിച്ചതോടെ ഇരു പാലങ്ങളിലൂടെയുമുള്ള യാത്ര വണ്‍വെയായി ക്രമീകരിച്ചു.
പഴയ പാലത്തില്‍ രൂപം കൊണ്ടിട്ടുള്ള കുഴിയാണിപ്പോള്‍ പരാതികള്‍ക്ക് ഇടവരുത്തിയിട്ടുള്ളത്. കുഴി രൂപം കൊണ്ടിട്ട് നാളുകളായെങ്കിലും കുഴിയടക്കാനുള്ള നടപടി ഉണ്ടായിട്ടില്ലെന്നാണ് ആക്ഷേപം. മഴ പെയ്തതോടെ കുഴിയുടെ വലിപ്പം വര്‍ധിച്ചു. മഴ വെള്ളം കെട്ടികിടക്കുന്ന സ്ഥിതിയുമുണ്ട്. ഭാരവാഹനങ്ങളും ബസുകളുമൊക്കെ ഈ കുഴിയില്‍ ചാടുമ്പോള്‍ പാലം നിരന്തരം കുലുങ്ങുന്നതും ആശങ്കയാണ്. വര്‍ഷങ്ങള്‍ക്ക് മുമ്പ് ബ്രിട്ടിഷു കാരാണ് മുതിരപ്പുഴക്ക് കുറുകെ മൂന്നാറിനെയും മാട്ടുപ്പെട്ടി, ദേവികുളം മേഖലകളെയും ബന്ധിപ്പിക്കുന്ന ഈ ഇരുമ്പുപാലം നിര്‍മിച്ചത്.
കരിങ്കല്‍ തൂണുകളില്‍ ഇരുമ്പുപാളികള്‍ നിരത്തിയാണ് പാലം നിര്‍മിച്ചത്. സൈന്യം നിര്‍മ്മിക്കുന്ന ബെയ്ലി പാലത്തിനു സമാനമായുള്ള സാങ്കേതിക വിദ്യയിലായിരുന്നു നിര്‍മിതി. പഴക്കമേറെയുള്ള ഈ പാലത്തിലെ കുഴി നികത്താന്‍ ഇനിയും താമസിയാതെ നടപടി വേണമെന്നാണ് ആവശ്യം.
