അടിമാലി: വെള്ളത്തൂവല്‍ പഞ്ചായത്ത് ഭരണസമിതിക്കെതിരെ വിവിധയാവശ്യങ്ങള്‍ ഉന്നയിച്ച് ഗ്രാമപഞ്ചായത്തോഫീസിന് മുമ്പില്‍ കോണ്‍ഗ്രസ് പ്രതിഷേധ മാര്‍ച്ചും ധര്‍ണ്ണയും നടത്തി. മുതുവാന്‍കുടിയില്‍ പ്രവര്‍ത്തിക്കുന്ന വെള്ളത്തൂവല്‍ പഞ്ചായത്തിന്റെ മാലിന്യപരിപാലന കേന്ദ്രവുമായി ബന്ധപ്പെട്ട് കോണ്‍ഗ്രസ് നേതൃത്വം നല്‍കുന്ന പഞ്ചായത്തിലെ പ്രതിപക്ഷം അഴിമതിയാരോപണം ഉയര്‍ത്തുന്നുണ്ട്. മാലിന്യം തരംതിരിച്ച് വിറ്റതിലടക്കം ക്രമക്കേട് നടന്നുവെന്നാണ് പ്രതിപക്ഷ ആരോപണം.
പ്രതിപക്ഷ ആരോപണത്തിന് പിന്നാലെയാണ് വിഷയം കോണ്‍ഗ്രസ് മണ്ഡലം കമ്മിറ്റി ഏറ്റെടുത്തിട്ടുള്ളത്. പഞ്ചായത്തില്‍ വികസന മുരടിപ്പും അഴിമതിയുമെന്നാരോപിച്ച് കോണ്‍ഗ്രസ് പഞ്ചായത്തോഫീസിന് മുമ്പില്‍ പ്രതിഷേധ മാര്‍ച്ചും ധര്‍ണ്ണയും സംഘടിപ്പിച്ചു. പ്രകടനമായെത്തിയ പ്രതിഷേധക്കാരെ പോലീസ് പഞ്ചായത്ത് കവാടത്തില്‍ തടഞ്ഞു.കോണ്‍ഗ്രസ് വെള്ളത്തൂവല്‍ മണ്ഡലം കമ്മിറ്റിയുടെ നേതൃത്വത്തില്‍ നടന്ന പ്രതിഷേധ സമരം ഡി സി സി പ്രസിഡന്റ് സി പി മാത്യു ഉദ്ഘാടനം ചെയ്തു.
കഴിഞ്ഞ 9 വര്‍ഷമായി പഞ്ചായത്തില്‍ വികസനമുരടിപ്പെന്നാണ് കോണ്‍ഗ്രസിന്റെ ആരോപണം. പഞ്ചായത്തിന്റെ വിവിധയിടങ്ങളില്‍ പുഴയില്‍ നിന്നും വാരി സൂക്ഷിച്ചിരുന്ന മണല്‍ സംബന്ധിച്ചും മുതുവാന്‍കുടിയിലെ പഞ്ചായത്തിന്റെ നീന്തല്‍കുളം സംബന്ധിച്ചും തൊഴിലുറപ്പ് പദ്ധതിയുമായി ബന്ധപ്പെട്ടും കോണ്‍ഗ്രസ ് വിവിധ ആക്ഷേപങ്ങള്‍ ഉന്നയിക്കുന്നുണ്ട്. പ്രതിഷേധ സമരത്തില്‍ കോണ്‍ഗ്രസ് മണ്ഡലം പ്രസിഡന്റ് സി ഡി ടോമി അധ്യക്ഷത വഹിച്ചു. എ പി ഉസ്മാന്‍, ബാബു പി കുര്യാക്കോസ്, ജോര്‍ജ്ജ് തോമസ്, എ എന്‍ സജികുമാര്‍, പയസ് എം പറമ്പില്‍, റോയി പാലക്കല്‍ തുടങ്ങി വിവിധ നേതാക്കളും പ്രവര്‍ത്തകരും പ്രതിഷേധ സമരത്തില്‍ പങ്കെടുത്തു.
