ദേശീയപാത85ലെ നിര്‍മ്മാണ പ്രതിസന്ധി; ലോംങ്ങ് മാര്‍ച്ചും പ്രതിഷേധ പരിപാടികളും നാളെ
അടിമാലി: ദേശീയപാത85ലെ നിര്‍മ്മാണ പ്രതിസന്ധി പരിഹരിക്കണമെന്നാവശ്യപ്പെട്ട് ദേശിയപാത സംരക്ഷണ സമിതി ആഹ്വാനം ചെയ്തിട്ടുള്ള ലോംങ്ങ് മാര്‍ച്ചും പ്രതിഷേധ പരിപാടികളും നാളെ നടക്കും. ദേശിയപാത85ന്റെ ഭാഗമായ നേര്യമംഗലം വനമേഖലയിലെ നവീകരണ പ്രവര്‍ത്തനങ്ങള്‍ നിര്‍ത്തിവയ്ക്കേണ്ടതായി വന്ന സാഹചര്യത്തിനെതിരെ കഴിഞ്ഞ കുറച്ച് ദിവസങ്ങളായി ഹൈറേഞ്ച് മേഖലയില്‍ വലിയ പ്രതിഷേധമാണ് നിലനില്‍ക്കുന്നത്.
നിര്‍മ്മാണ പ്രതിസന്ധി പരിഹരിക്കാന്‍ അടിയന്തിര സര്‍ക്കാര്‍ ഇടപെടല്‍ വേണമെന്ന ആവശ്യം ശക്തമാണ്.ഈ സാഹചര്യത്തിലാണ് വിഷയത്തില്‍ പ്രശ്ന പരിഹാരമാവശ്യപ്പെട്ട് നാളെ ദേശിയപാത സംരക്ഷണ സമിതി ലോംങ്ങ് മാര്‍ച്ചിനും താലൂക്ക് ഹര്‍ത്താലിനും ആഹ്വാനം ചെയ്തിട്ടുള്ളത്. പ്രതിഷേധ സൂചകമായി നടക്കുന്ന ലോംങ്ങ് മാര്‍ച്ചില്‍ വലിയ ബഹുജന പങ്കാളിത്തമുണ്ടാകുമെന്നാണ് ദേശിയപാത സംരക്ഷണ സമിതിയുടെ വിലയിരുത്തല്‍. ആറാം മൈലില്‍ നിന്ന് നേര്യമംഗലത്തേക്കാണ് ലോംങ്ങ് മാര്‍ച്ചിന് രൂപം നല്‍കിയിട്ടുള്ളത്.
ആറാം മൈലില്‍ നിന്നും ഫ്‌ളാഗ് ഓഫ് ചെയ്യുന്ന ലോംങ്ങ് മാര്‍ച്ച് നേര്യമംഗലം പാലത്തിനപ്പുറം സമാപിക്കും. തുടര്‍ന്ന് പ്രതിഷേധ സമ്മേളനം നടക്കും.ലോംങ്ങ് മാര്‍ച്ചിന് എല്ലാ വിഭാഗം ആളുകളുടെയും പിന്തുണ അഭ്യര്‍ത്ഥിക്കുന്നതായി ദേശിയപാത സംരക്ഷണ സമിതി ഭാരവാഹികള്‍ പറഞ്ഞു. വനംവകുപ്പിന്റെയും പരിസ്ഥിതിവാദികളുടെയും ഉദ്യോഗസ്ഥ ലോബിയുടെയും തന്ത്രപരമായ നീക്കമാണ് ഇപ്പോഴത്തെ പ്രതിസന്ധിക്ക് കാരണമെന്നാണ് ദേശീയപാത സംരക്ഷണ സമിതിയുടെ ആരോപണം.
റവന്യൂ രേഖകളനുസരിച്ച് റോഡുമായി ബന്ധപ്പെട്ട് 100 അടി വീതിയിലുള്ള ഭൂമി പൊതുമരാമത്ത് വകുപ്പിന് അവകാശപ്പെട്ടതാണെന്ന ഹൈക്കോടതി ഡിവിഷന്‍ ബെഞ്ച് വിധി നിലനില്‍ക്കെയാണ് സര്‍ക്കാരിനും ചീഫ് സെക്രട്ടറിക്കും വേണ്ടി അഡീഷണല്‍ ചീഫ് സെക്രട്ടറി ഈ ഭാഗം വനമാണെന്ന് റിപ്പോര്‍ട്ട് നല്‍കിയത്. ഇതിന്റെ അടിസ്ഥാനത്തിലാണ് ഇപ്പോഴത്തെ കോടതി വിധി. സര്‍ക്കാര്‍ ഇടപെട്ട് യഥാര്‍ത്ഥ രേഖകള്‍ കോടതിയില്‍ ഹാജരാക്കി നിര്‍മ്മാണ പ്രവര്‍ത്തനങ്ങള്‍ പുനരാരംഭിക്കുന്നതിനുള്ള അടിയന്തിര നടപടി സ്വീകരിക്കണമെന്നും ദേശീയപാത സംരക്ഷണ സമിതി ആവശ്യപ്പെട്ടു.
വിഷയത്തില്‍ ദേശിയപാത സംരക്ഷണ സമിതിയുടെ പ്രതിഷേധ പരിപാടികള്‍ക്ക് പിന്തുണ നല്‍കി യുഡിഎഫും ദേവികുളം താലൂക്കില്‍ നാളെ ഹര്‍ത്താലിനാഹ്വാനം ചെയ്തിട്ടുണ്ട്. വിവിധ മത, സാമുദായിക, കര്‍ഷക സംഘടനകളും വിവിധ കൂട്ടായ്മകളും ലോംങ്ങ മാര്‍ച്ചിന് പിന്തുണ പ്രഖ്യാപിച്ചിട്ടുണ്ട്.
