മൂന്നാര്‍ മേഖലയിലെ വഴിയോരക്കടകള്‍ ഒഴിയണമെന്നാവശ്യപ്പെട്ട് ദേശിയപാത വിഭാഗത്തിന്റെ നോട്ടീസ്
മൂന്നാര്‍: കൊച്ചി ധനുഷ്‌ക്കോടി ദേശിയപാതയോരത്ത് മൂന്നാര്‍ മേഖലയില്‍ പ്രവര്‍ത്തിക്കുന്ന വഴിയോരക്കടകള്‍ ഒഴിയണമെന്നാവശ്യപ്പെട്ട് ദേശിയപാത വിഭാഗത്തിന്റെ നോട്ടീസ്. ഇത് സംബന്ധിച്ചുള്ള അറിയിച്ച് കടകളില്‍ പതിക്കുകയും വഴിയോരകടകള്‍ നടത്തുന്നവര്‍ക്ക് കൈമാറുകയുംചെയ്തു. നോട്ടീസ് ലഭിച്ച് 7 ദിവസത്തിനകം കടകള്‍ നീക്കം ചെയ്യണമെന്നാണ് അറിയിപ്പ്.
അല്ലാത്ത പക്ഷം കൈയ്യേറ്റം ഒഴിപ്പിക്കുമെന്നും ഇതുമായി ബന്ധപ്പെട്ടുണ്ടാകുന്ന ചിലവ് കടയുടമകളില്‍ നിന്ന് ഈടാക്കുമെന്നും അറിയിപ്പില്‍ പറയുന്നു. നാളുകള്‍ക്ക് മുമ്പ് മൂന്നാര്‍ മേഖലയില്‍ വഴിയോരക്കടകള്‍ ഒഴിപ്പിച്ചിരുന്നു. ഇതിന് ശേഷം വീണ്ടും വഴിയോരക്കടകള്‍ സ്ഥാപിക്കപ്പെട്ടിട്ടുള്ള സാഹചര്യത്തില്‍ കൂടിയാണ് ദേശിയപാത വിഭാഗത്തിന്റെ ഇപ്പോഴത്തെ നടപടി. രണ്ടാംമൈലിലടക്കം നിരവധിയായ വഴിയോരക്കടകള്‍ ദേശിയപാതയോരത്തുണ്ടായിരുന്നു.
ഇവയെല്ലാം പൂര്‍ണ്ണമായി നീക്കം ചെയ്യപ്പെട്ടു. മൂന്നാര്‍ മേഖലയില്‍ വഴിയോരക്കടകള്‍ നീക്കം ചെയ്യുന്നഘട്ടത്തില്‍ പ്രതിഷേധമുയരുകയും രാഷ്ട്രീയ ഇടപെടല്‍ ഉണ്ടാവുകയും ചെയ്തിരുന്നു. ഇതോടെ നീക്കം നിലച്ചു. മാസങ്ങള്‍ പിന്നിട്ടതോടെ പുതിയതായി വീണ്ടും മറ്റ് പലയിടങ്ങളിലുമായി വഴിയോരക്കടകള്‍ രൂപം കൊണ്ടു. വഴിയോരക്കടകള്‍ വര്‍ധിച്ചാല്‍ വീണ്ടും ഗതാഗതകുരുക്കടക്കമുള്ള പ്രശ്‌നങ്ങള്‍ക്ക് ഇടയാക്കുമെന്ന സാഹചര്യത്തിലാണ് ഒഴിപ്പിക്കല്‍ നീക്കവുമായി ദേശിയപാത വിഭാഗം രംഗത്ത് വന്നിട്ടുള്ളത്.
