ഇടുക്കി ക്ലിക്‌സ് പദ്ധതിക്ക് മൂന്നാര്‍ ബൊട്ടാണിക്കല്‍ ഗാര്‍ഡനില്‍ തുടക്കമായി
മൂന്നാര്‍: ഇടുക്കി ക്ലിക്‌സ് എന്ന പദ്ധതിക്ക് മൂന്നാര്‍ ബൊട്ടാണിക്കല്‍ ഗാര്‍ഡനില്‍ തുടക്കമായി. ജില്ലയില്‍ നടത്തുന്ന യാത്രകളില്‍ എടുക്കുന്ന ചിത്രങ്ങള്‍ ഓര്‍മ്മകളായി സൂക്ഷിക്കുന്ന തരത്തിലാണ് പദ്ധതി നടപ്പിലാക്കുന്നത്. ഡി റ്റി പിസിയുടെ കീഴിലുള്ള മൂന്നാര്‍ ബൊട്ടാണിക്കല്‍ ഗാര്‍ഡനിലേക്ക് സഞ്ചാരികളെ ആകര്‍ഷിക്കുന്നതിന് നിരവധി പദ്ധതികളാണ് നടപ്പിലാക്കി വരുന്നത്.
ഇതിന്റെ ഭാഗമായിട്ടാണ് ഇടുക്കി ക്ലിക്‌സ് എന്ന പദ്ധതിയും ആരംഭിച്ചിരിക്കുന്നത്. പദ്ധതിയുടെ ഭാഗമായി ജില്ലയില്‍ പ്രധാന വിനോദ സഞ്ചാര കേന്ദ്രങ്ങളിലെല്ലാം ഫോട്ടോ പോയിന്റുകള്‍ സ്ഥാപിക്കും. വിനോദ സഞ്ചാരികളുടെ ഫോട്ടോ പകര്‍ത്തുന്ന ഫോട്ടോ ഗ്രാഫര്‍മാര്‍ ഇനി മുതല്‍ സഞ്ചാരികളുടെ ചിത്രം മഗ്ഗ്, കീ ചെയിന്‍, വസ്ത്രം, ഫ്‌ളാസ്‌ക് എന്നിവയിലും പ്രിന്റ് ചെയ്ത് നല്‍കും. ഇതിനായി ജില്ലാ അടിസ്ഥാനത്തില്‍ വിനോദ സഞ്ചാര കേന്ദ്രങ്ങളില്‍ പ്രവര്‍ത്തിക്കുന്ന ഫോട്ടോ ഗ്രാഫര്‍മാര്‍ക്ക് ഇതിനോടകം പരിശീലനം നല്‍കി കഴിഞ്ഞു.
പദ്ധതിയുടെ ഉദ്ഘാടനം ഇടുക്കി ജില്ലാ കളക്ടര്‍ വി വിഗ്‌നേശ്വരി നിര്‍വ്വഹിച്ചു.ഇതോടൊപ്പം ബൊട്ടാണിക്കല്‍ ഗാര്‍ഡനില്‍ കുടുംബശ്രീ അടക്കമുള്ള സംരംഭകരുടെ ഉത്പ്പന്നങ്ങല്‍ വിറ്റഴിക്കുന്ന പദ്ധതിയായ ഇടുക്കി ഇലക്ട്രയുടെ പേര് നിര്‍ദ്ദേശിച്ച വില്ലേജ് ഓഫീസ് ജീവനക്കാരനായ പ്രശാന്തിനെ ജില്ലാകളക്ടര്‍ ഉപഹാരം നല്‍കി അനുമോദിച്ചു. ഒപ്പം മൂന്നാര്‍ ടൂ മാങ്കുളം പോക്കറ്റ് മാപ്പ് പ്രകാശനം ദേവികുളം സബ് കളക്ടറായിരുന്ന വി എം ജയകൃഷ്ണന് നിര്‍വ്വഹിച്ചു..
ചടങ്ങില്‍ ദേവികുളത്ത് നിന്നും സ്ഥലം മാറി പോകുന്ന സബ് കളക്ടര്‍ വി എം ജയകൃഷ്ണന് ഉപഹാരങ്ങള്‍ സമ്മാനിച്ചു. പുതിയ സബ് കളക്ടറായി ചുമതലയേറ്റ വി എം ആര്യ, ഡി റ്റി പി സി സെക്രട്ടറി ജിതേഷ് തുടങ്ങിയവര്‍ പരിപാടിയില്‍ പങ്കെടുത്തു.
