അടിമാലി: അടിമാലി അപ്സരാകുന്ന് തലമാലി റോഡില്‍ തലമാലി വെള്ളച്ചാട്ടത്തിന് സമീപം കൊടും വളവിലെ അപകട സാധ്യത കുറക്കാനുള്ള നടപടി വൈകുന്നു. അടിമാലിയില്‍ നിന്നും കുരങ്ങാട്ടി, പീച്ചാട്, മാങ്കുളം മേഖലകളിലേക്ക് എളുപ്പത്തില്‍ സഞ്ചരിക്കാന്‍ കഴിയുന്ന റോഡാണ് അടിമാലി അപ്സരകുന്ന് തലമാലി റോഡ്. ഈ റോഡില്‍ തലമാലി വെള്ളച്ചാട്ടത്തിന് സമീപമാണ് അപകട സാധ്യതയേറെയുള്ള കുത്തനെയുള്ള കയറ്റവും കൊടും വളവും സ്ഥിതി ചെയ്യുന്നത്.
ഈ പാതയുടെ പല ഭാഗത്തും നാളുകള്‍ക്ക് മുമ്പ് വീതി വര്‍ധിപ്പിക്കല്‍ ജോലികള്‍ നടത്തിയിരുന്നു. ഇതോടെ ഇതുവഴി കടന്നു പോകുന്ന വാഹനങ്ങളുടെ എണ്ണം വര്‍ധിച്ചു. കയറ്റവും വളവുമുള്ള ഭാഗത്ത് കൂടി നിര്‍മ്മാണജോലികള്‍ നടത്തി അപകട സാധ്യത ഒഴിവാക്കണമെന്നാണ് ആവശ്യം. അടിമാലിയില്‍ നിന്നും മാങ്കുളത്തേക്കുള്ള വിനോദസഞ്ചാരികള്‍ ഉള്‍പ്പെടെ ഇതുവഴി കടന്നു പോകുന്നുണ്ട്.
കൊടും വളവും കുത്തനെയുള്ള കയറ്റവും മൂലം വഴിപരിചിതമല്ലാതെത്തുന്ന ഇരുചക്രവാഹനയാത്രികരടക്കം ഇവിടെ അപകടത്തില്‍പ്പെടുന്ന സംഭവങ്ങള്‍ വര്‍ധിക്കുന്നു. ഇടക്ക് വലിയ വാഹനങ്ങളും ഈ വളവില്‍ കുരുങ്ങുന്ന സംഭവങ്ങള്‍ ആവര്‍ത്തിക്കുന്നു. മഴ പെയ്തതോടെ കയറ്റവും വളവുമുള്ള ഭാഗത്ത് റോഡില്‍ കുഴികള്‍ രൂപം കൊണ്ടിട്ടുള്ളതും പ്രതിസന്ധിയാണ്. ഈ ഭാഗത്ത് നവീകരണജോലികള്‍ നടത്തുന്നത് ഇനിയും വൈകരുതെന്നാണ് ആവശ്യം.
