വെള്ളിയാമറ്റം ഗ്രാമപഞ്ചായത്ത് പന്നിമറ്റത്ത് ആരംഭിക്കുന്ന ജനകീയ ആരോഗ്യ കേന്ദ്രത്തിന്റെ നിര്‍മ്മാണം തുടങ്ങി. സ്ത്രീകള്‍ക്കും കുട്ടികള്‍ക്കും ഗര്‍ഭിണികള്‍ക്കുമുള്ള ആരോഗ്യ സേവനങ്ങള്‍, സ്ത്രീകള്‍ക്കുള്ള ക്ലിനിക്ക്,വയോജന ക്ലിനിക്ക്, ജീവിതശൈലി ക്ലിനിക്ക്,പാലിയേറ്റീവ് കെയര്‍ യൂണിറ്റ്,പ്രതിരോധ പ്രവര്‍ത്തനങ്ങള്‍, കുടുംബാസൂത്രണ പ്രവര്‍ത്തനങ്ങള്‍ എന്നീ സേവനങ്ങള്‍ ഇവിടെ നിന്നും ലഭിക്കും.
പന്നിമറ്റം സബ് സെന്ററിന്റെ കീഴില്‍ വെള്ളിയാമറ്റം പഞ്ചായത്തിലെ 4,5,6 വാര്‍ഡുകളാണ് ഉള്‍പ്പെടുത്തിയിരിക്കുന്നത്.
ദേശീയ ആരോഗ്യ ദൗത്യം ഫണ്ടില്‍ നിന്നും അമ്പത്തിയഞ്ച് ലക്ഷം രൂപ ചെലവഴിച്ചാണ് പുതിയ കെട്ടിടം നിര്‍മ്മിക്കുന്നത്. പ്രാരംഭ നിര്‍മ്മാണപ്രവര്‍ത്തനങ്ങള്‍ ആരംഭിച്ചു. ജനകീയ ആരോഗ്യ കേന്ദ്രത്തില്‍ ഒരു ഹെല്‍ത്ത് ഇന്‍സ്‌പെക്ടര്‍, ജൂനിയര്‍ പബ്ലിക് ഹെല്‍ത്ത് നഴ്‌സ്, എംഎല്‍എസ്പി മിഡ് ലെവല്‍ സര്‍വീസ് പ്രൊവൈഡര്‍ എന്നിവരുടെ സേവനം ലഭിക്കും. ജനകീയ ആരോഗ്യ കേന്ദ്രം പുതിയ കെട്ടിടത്തിന്റെ നിര്‍മ്മാണോദ്ഘാടനവും ശിലാസ്ഥാപനവും പഞ്ചായത്ത് പ്രസിഡന്റ് മോഹന്‍ദാസ് പുതുശ്ശേരി നിര്‍വഹിച്ചു.
യോഗത്തില്‍ പഞ്ചായത്ത് വൈസ് പ്രസിഡന്റ് ഷേര്‍ലി ജോസ്‌കുട്ടി അധ്യക്ഷത നിര്‍വഹിച്ചു. പഞ്ചായത്തിന്റെ ആരോഗ്യമേഖലയെ കൂടുതല്‍ ശക്തിപ്പെടുത്തുന്നതിന് ഈ ആരോഗ്യ കേന്ദ്രം സഹായിക്കുമെന്ന് പ്രസിഡന്റ് മോഹന്‍ദാസ് പുതുശ്ശേരി പറഞ്ഞു. ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ രാജി ചന്ദ്രശേഖരന്‍, വികസനകാര്യ ചെയര്‍പേഴ്‌സണ്‍ ഷെമിന അബ്ദുള്‍കരീം പഞ്ചായത്തംഗങ്ങളായ കൃഷ്ണന്‍ വി.കെ, കബീര്‍ കാസീം, പോള്‍ സെബാസ്റ്റ്യന്‍, രേഖ പുഷ്പരാജന്‍, ഇന്ദു ബിജു, പഞ്ചായത്ത് സെക്രട്ടറി ആനിയമ്മ ജോര്‍ജ്, പൂമാല പ്രാഥമികരോഗ്യ കേന്ദ്രം മെഡിക്കല്‍ ഓഫീസര്‍ ഡോ. ശാലു കെ. എച്ച്, പഞ്ചായത്ത് അസിസ്റ്റന്റ് എഞ്ചിനീയര്‍ ജോണ്‍സി ജോണ്‍, ആരോഗ്യപ്രവര്‍ത്തകര്‍, ആശാ പ്രവര്‍ത്തകര്‍, പൊതുജനങ്ങള്‍ തുടങ്ങിയവര്‍ പങ്കെടുത്തു.
