അടിമാലി: അടിമാലി ടൗണില്‍ ട്രാഫിക് പരിഷ്‌ക്കരണം നടപ്പാക്കണമെന്ന ആവശ്യത്തിന് ശക്തിയാര്‍ജിക്കുന്നു.ടൗണില്‍ ട്രാഫിക് പരിക്ഷ്‌ക്കരണം നടപ്പാക്കുകയും കൃത്യമായ മാനദണ്ഡങ്ങള്‍ കൊണ്ടുവന്ന് തോന്നുംപടിയുള്ള വാഹനപാര്‍ക്കിംങ്ങടക്കം നിയന്ത്രിച്ച് ടൗണിലൂടെയുള്ള വാഹനയാത്രയും കാല്‍നടയാത്രയും ഒരേപോലെ സുഗമമാക്കണമെന്നുമുള്ള ആവശ്യം കാലങ്ങളായി നിലനില്‍ക്കുന്നതാണ്. എന്നാല്‍ ഇക്കാര്യത്തില്‍ ഇനിയും ശാശ്വതമായ ഒരു പരിഹാരം ഉണ്ടായിട്ടില്ല.
ടൗണിലൂടെ കടന്നു പോകുന്ന ഇരു ദേശിയ പാതയോരങ്ങളിലും നോ പാര്‍ക്കിംഗ് കേന്ദ്രങ്ങളിലുമൊക്കെ തോന്നുംപടിയുള്ള വാഹന പാര്‍ക്കിംഗ് ഇപ്പോഴും തുടരുന്നു. ടൗണിലെ നടപ്പാതകളില്‍ വരെ ഇരുചക്രവാഹനങ്ങള്‍ പാര്‍ക്ക് ചെയ്ത് പോകുന്ന സ്ഥിതിയുണ്ട്. ഇത് സുഗമമായ കാല്‍നട യാത്രക്ക് ബുദ്ധിമുട്ടുയര്‍ത്തുന്നു. സമയാനുസൃതമായി ട്രാഫിക് പരിഷ്‌ക്കരണം സംബന്ധിച്ച തീരുമാനം കൈ കൊള്ളേണ്ടുന്ന ട്രാഫിക് അഡൈ്വസറി കമ്മിറ്റി പോലും വേണ്ടവിധം നടക്കുന്നില്ലെന്ന ആക്ഷേപം ഉയരുന്നു.
ബസ് സ്റ്റാന്‍ഡ് പരിസരത്തും താലൂക്ക് ആശുപത്രി പരിസരത്തും പോലീസ് സ്റ്റേഷന്‍ പരിസരത്തുമൊക്കെ വാഹനങ്ങള്‍ തോന്നുംപടി പാര്‍ക്ക് ചെയ്തു പോകുന്ന സാഹചര്യം ടൗണില്‍ തിരക്ക് വര്‍ധിക്കാന്‍ ഇടയാക്കുന്നു. വ്യാപാര സ്ഥാപനങ്ങള്‍ക്ക് മുന്‍പിലെ അനധികൃത പാര്‍ക്കിംഗ് വ്യാപാരികള്‍ക്ക് ബുദ്ധിമുട്ട് സൃഷ്ടിക്കുന്നുണ്ട്. വണ്‍വേ റോഡുകളില്‍ നിബന്ധന പാലിക്കാതെ വാഹനങ്ങള്‍ തലങ്ങും വിലങ്ങും പായുന്നു. ഓണാഘോഷങ്ങളുടെ ഭാഗമായി മൂന്നാറിലേക്ക് കൂടുതല്‍ സഞ്ചാരികള്‍ എത്തുന്നതോടെ അടിമാലി ടൗണില്‍ ഇനിയും തിരക്കേറും.
