മൂന്നാര്‍: മൂന്നാറില്‍ വിനോദ സഞ്ചാരികള്‍ക്കായി സൈറ്റ് സീന്‍ സര്‍വ്വീസ് നടത്തുന്ന കെ എസ് ആര്‍ ടി സി ഡബിള്‍ ഡക്കര്‍ ബസ് കഴിഞ്ഞ ദിവസമായിരുന്നു അപകടത്തില്‍പ്പെട്ടത്. ദേശിയപാതയില്‍ ദേവികുളം ഇരച്ചില്‍പാറക്ക് സമീപം വച്ചാണ് അപകടം സംഭവിച്ചത്. വാഹനത്തിന്റെ നിയന്ത്രണം നഷ്ടമായതോടെ പാതയോരത്തെ ബസ് കാത്തിരിപ്പ് കേന്ദ്രത്തിലിടിച്ചു. പിന്നീട് റോഡരികിലെ മണ്‍തിട്ടയില്‍ ഇടിച്ച് വാഹനം നിന്നു.
ഈ സംഭവത്തിന്റെ സിസിടിവി ദൃശ്യങ്ങളാണ് പുറത്ത് വന്നിട്ടുള്ളത്. എതിരെ വന്ന കാറില്‍ ഇടിക്കാതിരിക്കാന്‍ വെട്ടിച്ചപ്പോള്‍ ബസ് അപകടത്തില്‍പ്പെട്ടു എന്നായിരുന്നു സംഭവത്തില്‍ ഡ്രൈവറുടെ വിശദീകരണം. എന്നാല്‍ സിസിടിവിയില്‍ കാറിന്റെ ദൃശ്യങ്ങള്‍ ഇല്ല. സംഭവത്തില്‍ പോലീസ് കേസ് എടുത്തു. അപകട സമയത്ത് വാഹനത്തില്‍ താഴെയും മുകളിലുമുള്ള ഡക്കറുകളിലായി 40ല്‍ അധികം യാത്രക്കാരുണ്ടായിരുന്നു.
