മറയൂര്‍ ഉദുമല്‍പേട്ട അന്തര്‍ സംസ്ഥാനപാതയില്‍ റോഡരികില്‍ യാത്രക്കാരില്‍ ഭീതിയുണര്‍ത്തി ഒറ്റയാന്റെ സാന്നിധ്യം
മൂന്നാര്‍: മറയൂര്‍ ഉദുമല്‍പേട്ട അന്തര്‍ സംസ്ഥാനപാതയില്‍ റോഡരികില്‍ യാത്രക്കാരില്‍ ഭീതിയുണര്‍ത്തി ഒറ്റയാന്റെ സാന്നിധ്യം പതിവായി. റോഡിലിറങ്ങുന്ന കാട്ടാന പലപ്പോഴും വാഹനയാത്രികര്‍ക്ക് നേരെ പരാക്രമം നടത്തുന്ന സാഹചര്യമുണ്ട്. കഴിഞ്ഞ രണ്ടാഴ്ച്ചയായി മറയൂര്‍ ഉദുമല്‍പേട്ട അന്തര്‍ സംസ്ഥാനപാതയില്‍ രാത്രിയും പകലും മണിക്കൂറുകളുടെ ഇടവേളയില്‍ ഒറ്റയാന്‍ റോഡിലേ ക്കിറങ്ങുന്നതായി യാത്രക്കാര്‍ പറയുന്നു.
ഈ മേഖലയില്‍ വാഹനമോടിച്ച് അത്ര പരിചയമില്ലാത്ത വിനോദസഞ്ചാരികള്‍ അപ്രതീക്ഷിതമായി കൊമ്പന്റെ മുന്‍പില്‍പ്പെടുമ്പോള്‍ ഭയന്ന് വാഹനത്തിന്റെ നിയന്ത്രണം നഷ്ടപ്പെടുന്നത് അപകടത്തിന് കാരണമാകുന്നുണ്ട്. പലപ്പോഴും ഒറ്റയാന്‍ വാഹനത്തിനു നേരെ പാഞ്ഞടുക്കുന്നതായും ഇവര്‍ പറയുന്നു. കഴിഞ്ഞദിവസം റോഡരികില്‍ നിന്ന് സെല്‍ഫിയെടുത്തിരുന്ന വിനോദസഞ്ചാരി കള്‍ക്കടുത്തേക്ക് അപ്രതീക്ഷിതമായാണ് കൊമ്പന്‍ എത്തിയത്.
ഒരു യുവാവ് തലനാരിഴക്കാണ് ആനയുടെ ആക്രമണത്തില്‍ നിന്ന് രക്ഷപ്പെട്ടത്. ഇതു വഴി യാത്ര ചെയ്യുന്നവര്‍ വാഹനങ്ങളുടെ വേഗം കുറച്ച് ശ്രദ്ധിച്ച് പോകണമെന്ന് വനം വകുപ്പ് മുന്നറിയിപ്പും നല്‍കിയിട്ടുണ്ട്.
