അടിമാലി: ദക്ഷിണ കേരള ലജനത്തുല്‍ മുഅല്ലിമീന്‍ അടിമാലി മേഖലയും മഹല്ല് കോഡിനേഷനും സംയുക്തമായി നടത്തുന്ന മീലാദ് റസൂല്‍ സംഗമം ഈ മാസം 20ന് വൈകിട്ട് അടിമാലിയില്‍ നടക്കും. അടിമാലി ടൗണ്‍ ജുമാമസ്ജിദ് അങ്കണത്തിലാണ് മീലാദ് റസൂല്‍ സംഗമം നടക്കുന്നത്. പോയ വര്‍ഷങ്ങളിലും മീലാദ് റസൂല്‍ സംഗമം നടന്നിരുന്നു. പരിപാടിയുടെ ഭാഗമായി ഫലസ്തീന്‍ ഐക്യദാര്‍ഡ്യ മീലാദ് സന്ദേശറാലിയും മാനവ സൗഹാര്‍ദ്ദ സമ്മേളനവും നടക്കും.
പതാക ഉയര്‍ത്തലോടെ പരിപാടിക്ക് തുടക്കം കുറിക്കും. ഡി കെ എല്‍ എം അടിമാലി മേഖല പ്രസിഡന്റ് നൗഷാദ് മിഫ്താഹി പതാക ഉയര്‍ത്തും.കോഡിനേഷന്‍ കമ്മിറ്റി ചെയര്‍മാന്‍ കെ എച്ച് അലി റാലി ഫ്്‌ളാഗ് ഓഫ് ചെയ്യും. അഡ്വ. ഡീന്‍ കുര്യാക്കോസ് എം പി പൊതു സമ്മേളനം ഉദ്ഘാടനം ചെയ്യും. അഡ്വ. എ രാജ എം എല്‍ എ മുഖ്യപ്രഭാഷണവും മാധ്യമ പ്രവര്‍ത്തകന്‍ അയ്യപ്പദാസ് നബിദിന സന്ദേശവും നല്‍കും. പ്രോഗ്രാം കമ്മിറ്റി ചെയര്‍മാന്‍ ബഷീര്‍ പഴമ്പള്ളിത്താഴം അധ്യക്ഷത വഹിക്കുന്ന സമ്മേളനത്തില്‍ ഫാ.ജോബിന്‍ മര്‍ക്കോസ് മൈലാത്തോട്ടത്തില്‍, ശിവഗിരിമഠം വേദതീര്‍ത്ഥസ്വാമികള്‍ എന്നിവര്‍ മതസൗഹാര്‍ദ സന്ദേശം നല്‍കും.
ഡി കെ എല്‍ എം അടിമാലി മേഖല ചെയര്‍മാന്‍ ഹാഫിസ് മുഹമ്മദ് ഷെരീഫ് അല്‍ അര്‍ഷദി ആമുഖപ്രഭാഷണം നടത്തും. പൊതു സമ്മേളനത്തിന് ശേഷം മീലാദ് റസൂല്‍ സംഗമം നടക്കും. ദക്ഷിണകേരള ജംഇയ്യത്തുല്‍ ഉല്‍മ എറണാകുളം ജില്ലാ സെക്രട്ടറി അല്‍ഉസ്താദ് മുഹമ്മദ് തൗഫിഖ് ബദ്‌രി മീലാദ് റസൂല്‍ പ്രഭാഷണം നടത്തും. സാമൂഹിക, സാംസ്‌ക്കാരിക, രാഷ്ട്രീയ, സാമുദായിക രംഗത്തെ പ്രമുഖര്‍ പരിപാടികളില്‍ പങ്കെടുക്കുമെന്നും സ്വാഗത സംഘം ചെയര്‍മാന്‍ ബഷീര്‍ പഴമ്പിള്ളിത്താഴം, കെ എച്ച് അലി, നൗഷാദ് മിഫ്താഹി, ഹാഫിസ് മുഹമ്മദ് ഷരീഫ് അര്‍ഷദി, നൗഫല്‍ ബാഖവി, സുനീര്‍ കാരിമറ്റം, യുനസ് വള്ളോംപടി, ജെബിഎം അന്‍സാര്‍, നിസാര്‍ പട്ടളായി തുടങ്ങിയവര്‍ വാര്‍ത്താ സമ്മേളനത്തില്‍ അറിയിച്ചു.
