ഭൂട്ടാന്‍ വഴി വാഹനകടത്ത്; ഓപ്പറേഷന്‍ നുംഖോറിന്റെ ഭാഗമായി അടിമാലിയിലും പരിശോധന
അടിമാലി: ഭൂട്ടാന്‍ വഴി കോടികള്‍ നികുതി വട്ടിച്ചുള്ള വാഹന കടത്ത് കണ്ടെത്താനുള്ള കസ്റ്റംസിന്റെ ഓപ്പറേഷന്‍ നുംഖോറിന്റെ ഭാഗമായി അടിമാലിയിലും പരിശോധന.ചിപ്പു എല്‍സി ഗേള്‍ എന്ന് അറിയപ്പെടുന്ന തിരുവനന്തപുരം സ്വദേശിനി ശില്‍പ്പ സുരേന്ദ്രന്റെ ലാന്‍ഡ് ക്രൂയിസര്‍ കാറുമായി ബന്ധപ്പെട്ട പരിശോധനക്കായാണ് കസ്റ്റംസ് ഉദ്യോഗസ്ഥര്‍ അടിമാലിയില്‍ എത്തിയത്. ഓപ്പറേഷന്‍ നുംഖോറിന്റെ ഭാഗമായിട്ടാണ് പരിശോധന നടന്നത്. മെക്കാനിക്ക് പണികള്‍ക്കായാണ് കാര്‍ അടിമാലിയില്‍ എത്തിച്ചിരുന്നത്.
മെക്കാനിക്ക് ജോലികള്‍ തുടങ്ങുകയും ചെയ്തിരുന്നു. ഇതിനിടെയാണ് ഓപ്പറേഷന്‍ നുംഖോറിന്റെ ഭാഗമായി കസ്റ്റംസിന്റെ പരിശോധന ഉണ്ടായിട്ടുള്ളത്. 2023 സെപ്തംബര്‍ മാസത്തില്‍ മലപ്പുറം തിരൂര്‍ സ്വദേശികളായ ഡീലര്‍മാരില്‍ നിന്നാണ് ശില്‍പ്പ വാഹനം വാങ്ങിയത്. മുമ്പ് കര്‍ണ്ണാടക രജിസ്‌ട്രേഷന്‍ വാഹനമായിരുന്നു ഇത്. തിരൂര്‍ സ്വദേശികളായ ഡീലര്‍മാര്‍ കര്‍ണാടക വാഹന വകുപ്പില്‍ നിന്നുള്ള എന്‍ ഒ സിയും ആര്‍സി ബുക്കും കാണിച്ചിരുന്നുവെന്നും ശില്‍പ്പ പറഞ്ഞു.
കര്‍ണാടക സ്വദേശികള്‍ വാഹനം വാങ്ങിയത് കോയമ്പത്തൂരില്‍ നിന്നും ആണെന്ന് പറയപ്പെടുന്നു.
നിലവില്‍ വാഹനത്തിന്റെ ഇപ്പോഴത്തെ ഉടമയായ ശില്‍പ വാഹനത്തിന്റെ അഞ്ചാമത്തെ ഓണര്‍ ആണ്. ഇക്കഴിഞ്ഞ ഫെബ്രുവരി മാസത്തിലാണ് മെക്കാനിക്കല്‍ പെയിന്റിംഗ് വര്‍ക്കുകള്‍ക്കായി ശില്‍പ്പ കാര്‍ അടിമാലിയില്‍ ഉള്ള വര്‍ക്ക് ഷോപ്പില്‍ എത്തിച്ചത്. റാലി ഡ്രൈവറായ ശില്‍പ്പ, അധ്യാപന ജോലിയില്‍ നിന്നും മിച്ചം കിട്ടിയ തുക കൂട്ടി വെച്ചാണ് തിരൂര്‍ സ്വദേശികളില്‍ നിന്നും ലാന്‍ഡ് ക്രൂയിസര്‍ 96 മോഡല്‍ കാര്‍ 15 ലക്ഷം രൂപക്ക് വാങ്ങിയത്. വാഹനം നഷ്ടമായാല്‍ ഇതുവരെ താന്‍ കൂട്ടിവച്ച സമ്പാദ്യം ഇല്ലാതാകുമോയെന്ന ആശങ്കയും ശില്‍പ്പ പങ്ക് വച്ചു.
