അടിമാലി ഗ്രാമപഞ്ചായത്തിന് മുമ്പില്‍ മഹാത്മാഗാന്ധിയുടെ അര്‍ധകായ പ്രതിമ സ്ഥാപിക്കുന്നു
അടിമാലി: അടിമാലി ഗ്രാമപഞ്ചായത്തിന് മുമ്പില്‍ മഹാത്മാഗാന്ധിയുടെ അര്‍ധകായ പ്രതിമസ്ഥാപിക്കാന്‍ ഭരണസമിതി തീരുമാനം. ഏതാനും വര്‍ഷങ്ങള്‍ക്ക് മുമ്പായിരുന്നു അടിമാലി ഗ്രാമപഞ്ചായത്തിന്റെ പ്രധാന കവാടത്തിനരികെ മഹാത്മാഗാന്ധിയുടെ പൂര്‍ണ്ണകായ പ്രതിമസ്ഥാപിക്കപ്പെട്ടത്. പ്രധാന കവാടത്തിനരികെ മണ്ഡപം തീര്‍ത്ത് അതിനുള്ളിലാണ് പ്രതിമ സ്ഥാപിക്കപ്പെട്ടിട്ടുള്ളത്.
ഇതിന് ശേഷമാണിപ്പോള്‍ പഞ്ചായത്തിനോട് ചേര്‍ന്ന് തന്നെ മഹാത്മാഗാന്ധിയുടെ അര്‍ധകായ പ്രതിമസ്ഥാപിക്കാന്‍ ഭരണസമിതി തീരുമാനം കൈകൊണ്ടിട്ടുള്ളത്. 2024-2025 വാര്‍ഷിക പദ്ധതിയില്‍ ഉള്‍പ്പെടുത്തിയാണ് പ്രതിമ സ്ഥാപിക്കുന്നത്. ഇതിനായുള്ള നിര്‍മ്മാണ ജോലികള്‍ പുരോഗമിക്കുകയാണ്. എറണാകുളം തൃപ്പൂണിത്തുറ കേന്ദ്രമാക്കിയുള്ള കേരള ഗ്രാമവികസന സാനിറ്റേഷന്‍ സൊസൈറ്റിയാണ് നിര്‍മ്മാണ ജോലികള്‍ എടുത്തിട്ടുള്ളത്.
ഒക്ടോബര്‍ 2 ഗാന്ധിജയന്തി ദിനത്തില്‍ പുതിയ പ്രതിമ അനാഛാദനം ചെയ്യാന്‍ പഞ്ചായത്ത് ഭരണസമിതി ലക്ഷ്യമിടുന്നു.3 ലക്ഷത്തോളം രൂപ മുടക്കിയാണ് പുതിയ അര്‍ധകായ പ്രതിമ സ്ഥാപിക്കുന്നത്. മുമ്പ് പ്രധാന കവാടത്തിനരികെ നിര്‍മ്മിക്കപ്പെട്ടിട്ടുള്ള മണ്ഡപം വലിയ വാഹനങ്ങള്‍ പഞ്ചായത്ത് കോമ്പൗണ്ടില്‍ പ്രവേശിക്കുന്നതിന് ബുദ്ധിമുട്ട് സൃഷ്ടിക്കുന്നുവെന്നതരത്തിലുള്ള പരാതികള്‍ക്ക് ഇടവരുത്തിയിരുന്നു. ഈ മണ്ഡപവും മണ്ഡപത്തിലെ ഗാന്ധി പ്രതിമയും സംബന്ധിച്ച് കൂടിയാലോചനകള്‍ക്ക് ശേഷം പിന്നീട് തീരുമാനം കൈകൊള്ളുമെന്ന് ഗ്രാമപഞ്ചായത്ത് വൈസ് പ്രസിഡന്റ് അനസ് ഇബ്രാഹിം പറഞ്ഞു.
അതേ സമയം പുതിയ അര്‍ധകായ പ്രതിമസ്ഥാപിക്കുന്നതുമായി ബന്ധപ്പെട്ട് ചില ആക്ഷേപങ്ങളും ഉയര്‍ന്നിട്ടുണ്ട്. പുതിയ പ്രതിമസ്ഥാപിക്കുന്നത് വീണ്ടും പണച്ചിലവിന് ഇടവരുത്തുന്നുവെന്നാണ് ഉയരുന്ന ആക്ഷേപങ്ങളില്‍ ഒന്ന്.
