അടിമാലി സെന്റ് തോമസ് ഓര്‍ത്തഡോക്‌സ് പള്ളിയുടെ നാല്‍പ്പത്തിരണ്ടാമത് പെരുന്നാളിന് കൊടി ഉയര്‍ന്നു
അടിമാലി: അടിമാലി സെന്റ് തോമസ് ഓര്‍ത്തഡോക്‌സ് പള്ളിയുടെ നാല്‍പ്പത്തിരണ്ടാമത് പെരുന്നാളും അഭിവന്ദ്യ ഡോ. ഫിലിപ്പോസ് മാര്‍ തെയോഫിലോസ് തിരുമേനിയുടെ ശ്രാദ്ധപ്പെരുന്നാളിനും തുടക്കം കുറിച്ചു. അടുത്ത മാസം 2 വരെയാണ് തിരുന്നാള്‍ നടക്കുന്നത്.രാവിലെ പ്രഭാത നമസ്‌ക്കാരം, വിശുദ്ധ കുര്‍ബ്ബാന, പിതൃസ്മരണ എന്നിവക്ക് ശേഷം തിരുന്നാളിന് കൊടിയേറി. തുടര്‍ന്ന് പാച്ചോര്‍ നേര്‍ച്ച നടന്നു.
അടുത്ത മാസം 1ന് വൈകിട്ട് 5.30ന് സന്ധ്യാ നമസ്‌ക്കാരവും തുടര്‍ന്ന് പെരുന്നാള്‍ പ്രദക്ഷിണവും ആശിര്‍വാദവും നടക്കും. 2ന് രാവിലെ നടക്കുന്ന പ്രഭാത നമസ്‌ക്കാരത്തിന് ശേഷം അഭിവന്ദ്യ. യൂഹോനോന്‍ മാര്‍ പോളികോര്‍പ്പസ് മെത്രാപ്പോലീത്തായുടെ കാര്‍മ്മികത്വത്തില്‍ വിശുദ്ധ കുര്‍ബ്ബാന നടക്കും. തുടര്‍ന്ന് പ്രദക്ഷിണവും ആശിര്‍വാദവും നേര്‍ച്ചയും നടക്കും. ശേഷം ഇട്ടൂപ്പ് മെമ്മോറിയല്‍ സ്‌കോളര്‍ഷിപ്പ് വിതരണവും അനുമോദന ചടങ്ങും ക്രമീകരിച്ചിട്ടുണ്ട്.
തിരുന്നാളിന്റെ ഭാഗമായി 1ന് വൈകിട്ട് ചെണ്ടമേളം, ആകാശ ദീപകാഴ്ച്ച എന്നിവയും ഒരുക്കിയിട്ടുണ്ട്.ഇടവക വികാരി ഫാ.അജിത്ത് ജോസഫ് പുതുപ്പറമ്പില്‍, ട്രസ്റ്റി ജോണി എം പി, ജിന്‍ജോ ജോണ്‍, ജോമോന്‍ പി എം എന്നിവരുടെ നേതൃത്വത്തിലാണ് തിരുന്നാള്‍ ആഘോഷങ്ങള്‍ നടക്കുന്നത്.
