അടിമാലി: പരിമിതികള്‍ക്ക് നടുവില്‍ പ്രവര്‍ത്തിക്കുന്ന വെള്ളത്തൂവല്‍ പോലീസ് സ്‌റ്റേഷനായി പുതിയ കെട്ടിടം വേണമെന്ന് ആവശ്യം. വെള്ളത്തൂവല്‍, പള്ളിവാസല്‍, കൊന്നത്തടി പഞ്ചായത്തുകള്‍ ഉള്‍പ്പെടുന്നതാണ് വെള്ളത്തൂവല്‍ പോലീസ് സ്റ്റേഷന്. 5 വില്ലേജോഫീസുകളും ഇതിന്റെ പരിധിയില്‍ വരുന്നു.
ഇത്രയധികം സ്ഥല വിസ്തൃതിയിലെ ക്രമസമാധാന പാലനമുള്‍പ്പെടെ കൈകാര്യം ചെയ്യേണ്ടുന്ന പോലീസ് സ്‌റ്റേഷനാണ് മതിയാംവിധമുള്ള അടിസ്ഥാന കെട്ടിട സൗകര്യം പോലുമില്ലാതെ പരിമിതികള്‍ക്ക് നടുവിലൂടെ മുമ്പോട്ട് പോകുന്നത്. എസ് എച്ച് ഒ ഉള്‍പ്പെടെ 38 പോലീസ് ഉദ്യോഗസ്ഥരാണ് വെള്ളത്തൂവല്‍ പോലീസ് സ്റ്റേഷനില് ഉള്ളത്. 2004ല്‍ ആണ് വെള്ളത്തൂവല്‍ പോലീസ് സ്‌റ്റേഷനായി കെട്ടിടം പണി കഴിപ്പിക്കുന്നത്.
നിര്‍മ്മാണ ജോലികളില്‍ ദീര്‍ഘവീക്ഷണമില്ലാതെ വന്നതോടെയാണ് റോഡിനോടു ചേര്‍ന്ന കട്ടിംങ്ങിന് മുകളിലായി കെട്ടിട നിര്‍മ്മാണം നടത്തിയതെന്ന ആക്ഷേപം അക്കാലത്തെ ഉയര്‍ന്നിരുന്നു. രണ്ടേകാല്‍ ഏക്കര്‍ സ്ഥലം പോലീസ് സ്റ്റേഷന് സ്വന്തമായി ഉണ്ട്. 6 വനിതാ പോലീസ് ഉദ്യോഗസ്ഥരും വെള്ളത്തൂവല്‍ പോലീസ് സ്റ്റേഷനില് ഉണ്ട്. പരാതിയുമായി സ്റ്റേഷനില് എത്തുന്നവര്‍ക്ക് ഇരിക്കാന്‍ വേണ്ടുന്ന മതിയായ സ്ഥല സൗകര്യം പോലും വെള്ളത്തൂവല്‍ പോലീസ് സ്റ്റേഷനില് ഇല്ല.
ഇത്തരത്തില്‍ അടിസ്ഥാന കെട്ടിട സൗകര്യം ഇല്ലാത്തതിന്റെ ബുദ്ധിമുട്ട് പേറിയാണ് വെള്ളത്തൂവല്‍ പോലീസ് സ്‌റ്റേഷന്റെ പ്രവര്‍ത്തനം മുമ്പോട്ട് പോകുന്നത്. ഈ സാഹചര്യത്തിലാണ് വെള്ളത്തൂവല്‍ പോലീസ് സ്‌റ്റേഷനായി സൗകര്യമുള്ള പുതിയ സ്റ്റേഷന് കെട്ടിടം യാഥാര്‍ത്ഥ്യമാക്കണമെന്ന ആവശ്യം ഉയര്‍ന്നിട്ടുള്ളത്.
