പ്രതിപക്ഷനേതാവ് വി ഡി സതീശന്റെ നേതൃത്വത്തില്‍ അടിമാലിയില്‍ കര്‍ഷക കോണ്‍ക്ലേവ് നടന്നു
അടിമാലി: ജില്ലയിലെ ഭൂ പ്രശ്നങ്ങള്‍ക്ക് പരിഹാരം തേടി പ്രതിപക്ഷനേതാവ് വി ഡി സതീശന്റെ നേതൃത്വത്തില്‍ അടിമാലിയില്‍ കര്‍ഷക കോണ്‍ക്ലേവ് നടന്നു.സംസ്ഥാന സര്‍ക്കാര്‍ നടപ്പിലാക്കിയ ഭൂ നിയമ ഭേതഗതി വിഷയത്തിലടക്കം വിമര്‍ശനങ്ങളും ആശങ്കകളും ഉയര്‍ന്നിട്ടുള്ള സാഹചര്യത്തില്‍ കൂടിയാണ് അടിമാലിയില്‍ പ്രതിപക്ഷനേതാവിന്റെ നേതൃത്വത്തില്‍ കര്‍ഷക കോണ്‍ക്ലേവ് സംഘടിപ്പിച്ചത്. നിര്‍മ്മാണ നിരോധനമടക്കം ഏര്‍പ്പെടുത്തി ഇടതു സര്‍ക്കാര്‍ ജില്ലയിലെ ആളുകളെ പ്രതിസന്ധിയിലാക്കിയെന്നും ജില്ലക്ക് മേല്‍ കരി നിയമങ്ങള്‍ അടിച്ചേല്‍പ്പിക്കുന്നുവെന്നുമാണ് കോണ്‍ഗ്രസിന്റെയും യു ഡി എഫിന്റെയും വാദം.
ഈ സാഹചര്യത്തില്‍ കക്ഷി രാഷ്ട്രീയത്തിനതീതമായി പ്രശ്ന പരിഹാരത്തിനുള്ള പൊതു സംവാദ വേദിയായിട്ടാണ് കര്‍ഷക കോണ്‍ക്ലേവിനെ കോണ്‍ഗ്രസ് ഉയര്‍ത്തികാട്ടിയത്. കോണ്‍ക്ലേവില്‍ പങ്കെടുത്ത പ്രതിനിധികളുമായി മുഴുവന്‍ സമയവും സംവദിച്ച പ്രതിപക്ഷ നേതാവ് ഒടുവില്‍ വിഷയങ്ങളില്‍ യു ഡി എഫിന്റെ നിലപാട് പ്രഖ്യാപിച്ചു.
അഡ്വ. ഡീന്‍ കുര്യാക്കോസ് എം പി കോണ്‍ക്ലേവില്‍ മോഡറേറ്ററായി. കര്‍ഷകര്‍, തൊഴിലാളികള്‍, വ്യാപാരികള്‍, കര്‍ഷക സംഘടനാ ഭാരവാഹികള്‍, മത, സാമുദായിക പ്രതിനിധികള്‍ തുടങ്ങിയവരെല്ലാം കോണ്‍ക്ലേവില്‍ പങ്കെടുത്ത് ജില്ല നേരിടുന്ന വിവിധ വിഷയങ്ങള്‍ അവതരിപ്പിച്ചു.
അടിമാലി സെന്റ് ജോര്‍ജ്ജ് യാക്കോബായ പള്ളി പാരിഷ് ഹാളിലാണ് കര്‍ഷക കോണ്‍ക്ലേവിനുള്ള വേദിയൊരുക്കിയിരുന്നത്. ഡി സി സി പ്രസിഡന്റ് സി പി മാത്യു, യു ഡി എഫ് ജില്ലാ കണ്‍വീനര്‍ ജോയി വെട്ടിക്കുഴി തുടങ്ങി കോണ്‍ഗസിന്റെയും യുഡിഎഫിലേയും വിവിധ നേതാക്കള്‍, വിവിധ രാഷ്ട്രീയ പാര്‍ട്ടി പ്രതിനിധികളും കോണ്‍ക്ലേവില്‍ പങ്കെടുത്തു. ജില്ലയിലെ ഭൂപ്രശ്നങ്ങളില്‍ പരിഹാരം തേടുകയാണ് കോണ്‍ക്ലേവിലൂടെ ലക്ഷ്യമിടുന്നതെന്ന് കോണ്‍ഗ്രസ് പറയുമ്പോഴും തദ്ദേശ, നിയമ സഭാതിരഞ്ഞെടുപ്പുകള്‍ അടുക്കെ ജില്ലയിലെ ഭൂവിഷയങ്ങളെ വീണ്ടും സജീവ ചര്‍ച്ചയാക്കാനും കോണ്‍ക്ലേവിലൂടെ കോണ്‍ഗ്രസ് ലക്ഷ്യമിടുന്നുണ്ട്.
