മൂന്നാര്‍: മൂന്നാര്‍ മേഖലയില്‍ തുടര്‍ച്ചയായ രണ്ടാം ദിവസവും കടുവയുടെ ആക്രമണം. രണ്ട് കറവപ്പശുക്കളെ കടുവ കൊന്നു തിന്നു. മൂന്നാര്‍ സൈലന്റ് വാലി എസ്റ്റേറ്റ് മൂന്നാം ഡിവിഷനില്‍ ജേക്കബിന്റെ പശുക്കളെയാണ് കടുവ കൊന്നത്. മേയാന്‍ വിട്ട പശുക്കളെ കഴിഞ്ഞ ദിവസം കാണാതായിരുന്നു. നാട്ടുകാര്‍ നടത്തിയ അന്വേഷണത്തിലാണ് പാതി തിന്ന നിലയില്‍ പശുക്കളുടെ ജഡം കണ്ടെത്തിയത്. നാലു മാസം മുമ്പും ഇതേ സ്ഥലത്ത് കടുവ പശുവിനെ കൊന്നു തിന്നിരുന്നു.
കഴിഞ്ഞ ബുധനാഴ്ച്ച ദേവികുളം ഡി വിഷനില്‍ തൊഴിലാളി ലയത്തിന്റെ മുറ്റത്ത് കെട്ടിയിട്ടിരുന്ന പശുവിനെ കടുവ ആക്രമിച്ചിരുന്നു. അതിന് മുമ്പ് പകല്‍ ജനവാസ മേഖലയില്‍ മൂന്ന് കടുവകള്‍ ഒരുമിച്ചിറങ്ങിയത് തൊഴിലാളി കുടുംബങ്ങളില്‍ ആശങ്ക ഉയര്‍ത്തിയിരുന്നു. തൊഴിലാളി കുടുംബങ്ങളുടെ ഉപ ജീവനമാര്‍ഗമായ പശുക്കളെയാണ് കടുവ കൊല്ലുന്നത്. പലരും വായ്പയെടുത്താണ് പശുക്കളെ വാങ്ങുന്നത്. ഇവ നഷ്ടപ്പെടുന്നതോടെ തൊഴിലാളികള്‍ ദുരിതത്തി ലാകുന്നു.
ഇക്കഴിഞ്ഞ കാലയളവില്‍ ഇതുവരെ നൂറുകണക്കിന് പശുക്കളാണ് കടുവയുടെയും പുലിയുടെയുമൊക്കെ ആക്രമണത്തില്‍ കൊല്ലപ്പെട്ടിട്ടുള്ളത്. കഴിഞ്ഞ ഏതാനും നാളുകള്‍ക്കിടയില്‍ കന്നുകാലികള്‍ വന്യജീവിയാക്രമണത്തില്‍ കൊല്ലപ്പെടുന്ന സംഭവങ്ങള്‍ കുറഞ്ഞിരുന്നു. ഒരിടവേളക്ക് ശേഷം വീണ്ടും വന്യജീവിയാക്രമണം വര്‍ധിച്ച് വരുന്നത് ആശങ്കക്ക് ഇടവരുത്തിയിട്ടുണ്ട്.
