അടിമാലി: മാങ്കുളം ഗ്രാമപഞ്ചായത്തിന്റെ നേതൃത്വത്തില്‍ പണികഴിപ്പിക്കാന്‍ ലക്ഷ്യമിട്ടിട്ടുള്ള ബസ് സ്റ്റാന്‍ഡിന്റെ നിര്‍മ്മാണ ഉദ്ഘാടനം നടന്നു. ജില്ലാ ആസ്ഥാനത്തേയും മാങ്കുളത്തേയും ബന്ധിപ്പിച്ച് കെ എസ് ആര്‍ ടി സി ബസ് സര്‍വ്വീസാരംഭിക്കുന്ന കാര്യം പരിഗണിക്കുമെന്ന് ഉദ്ഘാടന ചടങ്ങില്‍ മന്ത്രി റോഷി അഗസ്റ്റിന്‍ പറഞ്ഞു. വിനോദ സഞ്ചാര മേഖലയില്‍ വികസന പാതയിലുള്ള പ്രദേശമാണ് മാങ്കുളം. മാങ്കുളത്തിന്റെ വികസനത്തിന് ആക്കം വര്‍ധിപ്പിക്കാന്‍ ലക്ഷ്യമിട്ടാണ് മാങ്കുളം ഗ്രാമപഞ്ചായത്ത് ബസ് സ്റ്റാന്‍ഡ് യാഥാര്‍ത്ഥ്യമാക്കാന്‍ ലക്ഷ്യമിട്ടിട്ടുള്ളത്.
ഇതിന്റെ ഭാഗമായിട്ടായിരുന്നു ബസ് സ്റ്റാന്‍ഡിന്റെ നിര്‍മ്മാണ ഉദ്ഘാടനം നടത്തിയത്. ജലവിഭവ വകുപ്പ് മന്ത്രി റോഷി അഗസ്റ്റിന്‍ നിര്‍മ്മാണ ഉദ്ഘാടനം നിര്‍വ്വഹിച്ചു. ജില്ലാ ആസ്ഥാനത്തേയും മാങ്കുളത്തേയും ബന്ധിപ്പിച്ച് കെ എസ് ആര്‍ ടി സി ബസ് സര്‍വ്വീസാരംഭിക്കുന്ന കാര്യം പരിഗണിക്കുമെന്ന് ചടങ്ങില്‍ മന്ത്രി പറഞ്ഞു. മാങ്കുളം ടൗണില്‍ റേഷന്‍കട സിറ്റിക്ക് സമീപമാണ് ബസ് സ്റ്റാന്‍ഡ് നിര്‍മ്മാണത്തിന് പഞ്ചായത്ത് ലക്ഷ്യമിട്ടിട്ടുള്ളത്.
1 കോടി 48 ലക്ഷത്തോളം രൂപ ചിലവഴിച്ച് ബസ് സ്റ്റാന്‍ഡ് നിര്‍മ്മിക്കാനാണ് പഞ്ചായത്തിന്റെ തീരുമാനം.ജില്ലാ ആസൂത്രണ സമിതി പദ്ധതിക്ക് അംഗീകാരം നല്‍കിയിട്ടുണ്ട്. ആദ്യഘട്ടത്തില്‍ ഡി പി ആര്‍ തയ്യാറാക്കി 38 ലക്ഷം രൂപയുടെ ടെന്‍ഡര്‍ നടപടികള്‍ പൂര്‍ത്തീകരിച്ചു. പഞ്ചായത്ത് കണ്ടെത്തുന്ന തുകക്ക് പുറമെ എം എല്‍ എ ഫണ്ട് കൂടി ബസ് സ്റ്റാന്‍ഡ് നിര്‍മ്മാണത്തിന് വിനിയോഗിക്കും. മാങ്കുളത്ത് ബസ് സ്റ്റാന്‍ഡില്ലാത്തതിനാല്‍ നിലവില്‍ ബസുകള്‍ ടൗണില്‍ പാതയോരത്താണ് നിര്‍ത്തിയിടുന്നത്.
