മറയൂര്‍: മറയൂര്‍ മേഖലയില്‍ കാട്ടാന ശല്യം അതിരൂക്ഷം. മറയൂര്‍ ബാബു നഗറിന് സമീപവും ഇന്ദിരാനഗറിലും കഴിഞ്ഞ ഏതാനും ദിവസങ്ങളായി കാട്ടാനയെത്തി വ്യാപക നാശനഷ്ടം വരുത്തുന്ന സ്ഥിതിയുണ്ട്. വീട്ടുമുറ്റം വരെയെത്തി കാട്ടാനകള്‍ ഭീതി പരത്തുന്ന സാഹചര്യമെന്ന് കുടുംബങ്ങള്‍ പറയുന്നു. കാട്ടാന ശല്യം രൂക്ഷമായതോടെ രാത്രികാലങ്ങളില്‍ പുറത്തിറങ്ങാന്‍ കഴിയാത്ത അവസ്ഥയിലാണ് കുടുംബങ്ങള്‍.
വീടുകള്‍ക്ക് സമീപമുള്ള കരിമ്പ്,വാഴ,തെങ്ങ്,തീറ്റ പുല്ല് തുടങ്ങി കൃഷികള്‍ പൂര്‍ണ്ണമായി നശിപ്പിക്കുന്നത് കുടുംബങ്ങളെ വലക്കുന്നു. രാത്രികാലത്ത് ജനവാസ മേഖലയില്‍ എത്തുന്ന കാട്ടാന പുലര്‍ച്ചെ മാത്രമെ പലപ്പോഴും മടങ്ങാറൊള്ളു. ആനകളെ തുരത്താന്‍ വനംവകുപ്പിന്റെ ഫലപ്രദമായ ഇടപെടല്‍ ഉണ്ടാകുന്നില്ലെന്നും പരാതിയുണ്ട്. പടക്കം പൊട്ടിച്ചും മറ്റും ആനകളെ താല്‍ക്കാലികമായി തുരത്തുകയല്ല, ആനകളെ നിരീക്ഷിച്ച് ജനവാസ മേഖലയില്‍ നിന്നും കാടുകയറ്റുകയാണ് വേണ്ടതെന്നും പ്രദേശവാസികള്‍ പറയുന്നു.
ഇന്ദിരാനഗറില്‍ കാട്ടാനക്ക് പുറമെ ചെന്നായ്ക്കള്‍ വളര്‍ത്ത് മൃഗങ്ങള്‍ക്ക് നേരെ ആക്രമണം നടത്തുന്ന സാഹചര്യവുമുണ്ട്. കഴിഞ്ഞ ദിവസം രണ്ടാടുകളെ ചെന്നായ്ക്കള്‍ വലിച്ചിഴച്ചുകൊണ്ടു പോയിരുന്നു.
