അടിമാലി താലൂക്ക് ആശുപത്രിയില് നിര്മ്മാണം പൂര്ത്തീകരിച്ച ഒ പി ബ്ലോക്കിന്റെ ഉദ്ഘാടനം ഈ മാസം 26ന്
അടിമാലി: അടിമാലി താലൂക്ക് ആശുപത്രിയില് നിര്മ്മാണം പൂര്ത്തീകരിച്ച ഒ പി ബ്ലോക്കിന്റെ ഉദ്ഘാടനം ഈ മാസം 26ന് ആരോഗ്യവകുപ്പ് മന്ത്രി വീണാ ജോര്ജ്ജ് നിര്വ്വഹിക്കും. കാത്ത് ലാബ്, സിസിയു യൂണിറ്റിനു വേണ്ടി നിര്മ്മിച്ച കെട്ടിടത്തിന്റെ ഒന്നും രണ്ടും നിലകളിലാണ് ഒ പി ബ്ലോക്കിനു വേണ്ടി കണ്സള്ട്ടിംങ്ങ് മുറികള് സജ്ജമാക്കിയിട്ടുള്ളത്.
കിഫ്ബി ഫണ്ടില് നിന്നുള്ള 10 കോടിയിലേറെ രൂപ മുടക്കിയാണ് കെട്ടിടത്തിന്റെ നിര്മ്മാണം നടത്തിയിട്ടുള്ളത്. കല്ലാര്, കാന്തല്ലൂര് പി എച്ച് സികള്ക്കായി പണികഴിപ്പിച്ച കെട്ടിടങ്ങളുടെ ഉദ്ഘാടനവും 26ന് നടക്കുമെന്ന് അഡ്വ. എ രാജ എം എല് എ അടിമാലിയില് പറഞ്ഞു. 6 മാസം മുന്പ് ബഹുനില കെട്ടിടത്തിന്റെ പണികള് പൂര്ത്തിയാക്കിയെങ്കിലും ഉദ്ഘാടനം നീളുകയായിരുന്നു. നിലവില് അസൗകര്യങ്ങളുടെ നടുവിലാണ് ആശുപത്രിയിലെ ഒപി വിഭാഗം പ്രവര്ത്തിച്ച് വരുന്നത്.
പുതിയ സ്ഥല സൗകര്യമൊരുങ്ങുന്നതോടെ ഈ പ്രശ്നത്തിന് പരിഹാരമാകും.പുതിയ കെട്ടിടത്തിന്റെ അടിനിലയില് കാത്ത് ലാബ് സിസിയു യൂണിറ്റ്, എക്സ്റേ വിഭാഗം എന്നിവക്കുള്ള സൗകര്യമാണുള്ളത്. ഇതില് എക്സറേ വിഭാഗത്തിന്റെ പ്രവര്ത്തനം ആരംഭിച്ചിരുന്നു. ഒന്നാം നിലയില് ജനറല് മെഡിസിന്, ഗൈനക്കോളജി, ഓര്ത്തോപീഡിക്സ്, രണ്ടാം നിലയില് പീഡിയാട്രിക്സ്, ഒഫ്ത്താല്മോളജി, ഡെന്റല്, ഇഎന്ടി, ജനറല് ഒപി, ഫീവര് ക്ലിനിക് എന്നിവക്കുള്ള മുറികളാണ് സജ്ജമാക്കിയിട്ടുള്ളത്.
