അടിമാലി മണ്ണിടിച്ചിലിൽ : ദേശീയപാത നിര്മ്മാണം നിര്ത്തിവെക്കാന് ദുരന്ത നിവാരണ നിയമപ്രകാരം ഉത്തരവ്..
അടിമാലി മണ്ണിടിച്ചിലിന്റെ പശ്ചാത്തലത്തില് ദേശീയപാത നിര്മ്മാണം നിര്ത്തിവെക്കാന് ദുരന്ത നിവാരണ നിയമപ്രകാരം ഉത്തരവ് നല്കിയിട്ടുണ്ട്. മണ്ണിടിച്ചില് ദുരന്ത സാധ്യതയുള്ള എന്എച്ച് 85ലും ജില്ലയിലെ മറ്റ് പ്രദേശങ്ങളിലും സ്ഥലം സന്ദര്ശിച്ച് പരിശോധന നടത്തി റിപ്പോര്ട്ട് സമര്പ്പിക്കാന് പ്രത്യേക ടീം രൂപീകരിച്ചു. ജില്ലാ ജിയോളജിസ്റ്റ്, ഹസാര്ഡ് അനലിസ്റ്റ്, സോയില് കണ്സര്വേഷന് ഓഫീസര്, ഗ്രൗണ്ട് വാട്ടര് വകുപ്പ് ജില്ലാ ഓഫീസര്, പൊതുമരാമത്ത് ദേശിയപാത വിഭാഗം എക്സിക്യൂട്ടീവ് എഞ്ചിനിയര്, ദേശീയപാത അതോരിറ്റി എക്സിക്യൂട്ടീവ് എഞ്ചിനീയര്, ദേവികുളം തഹസില്ദാര് എന്നിവര്ക്ക് രണ്ടു ദിവസത്തിനകം പ്രാഥമിക റിപ്പോര്ട്ടും നാല് ദിവസത്തിനകം വിശദമായ റിപ്പോര്ട്ടും സമര്പ്പിക്കാന് നിര്ദേശം നല്കി.
പഠന റിപ്പോര്ട്ട് ലഭ്യമാകുന്നത് വരെ മണ്ണിടിച്ചില് ദുരന്ത സാധ്യതയുള്ള എന്എച്ച് 85 ലെയും ജില്ലയിലെ മറ്റ് പ്രദേശങ്ങളിലെയും എല്ലാ നിര്മ്മാണ പ്രവര്ത്തനങ്ങളും നിര്ത്തിവയ്ക്കാന് ദേശീയപാത അതോറിറ്റി പ്രൊജക്ട് ഡയറക്ടര്ക്ക് നിര്ദേശം നല്കി. റോഡിലും വീടുകളിലേക്കും ഇടിഞ്ഞു വീണ മണ്ണ് നീക്കം ചെയ്യുന്നതിന് ഉത്തരവില് അനുവാദം നല്കിയിട്ടുണ്ട്.
